भांगरभूंय | प्रतिनिधी
मुख्यमंत्रीः 627 कोटींच्या उदका प्रकल्पांचें काम सुरू
भांगरभूंय । प्रतिनिधी
पणजीः उत्तर गोंयांत फुडलीं 25 वर्सां उदकाची समस्या जावची न्हय हे खातीर सरकारा वतीन विवीध उदका प्रकल्प सुरू केल्यात. ते खातीर 627.86 कोटी रुपया मंजूर केल्यात. अंदूं हातूंतलीं 304.48 कोटी रुपयांचीं कामां सुरू जाल्यात, अशी म्हायती मुख्यमंत्री डॉ. प्रमोद सावंत हांणी दिली. शुक्रारा तांणी तिळारी कानाल, साळ बांद, आमठाणें धरणार चालू आशिल्ल्या उदक प्रकल्पांच्या कामांचो नियाळ घेतलो. ह्या वेळार उदकास्रोत मंत्री सुभाष शिरोडकार, आमदार डॉ. चंद्रकांत शेट्ये, मुख्य अभियंतो प्रमोद बदामी आनी हेर अधिकारी हाजीर आशिल्ले.
मुख्यमंत्र्यान सांगलें, ह्या कामां मदीं तिळारी कानाल दुरुस्ती, साळांतल्या बांदाची सांठ्याची तांक वाडोवप, आमठाणें धरण वाठारांतलीं कामां हांचो आस्पाव आसा. गोंयचे हद्दींतल्या 30 किलोमिटरा मदल्या 15 किलोमिटर कानालाचे दुरुस्तीचें काम पुराय जालां. उरिल्लें काम बेगिनूच पुराय जातलें. ह्या प्रकल्पा खातीर गोंय सरकारान 128 कोटी रुपया खर्च केल्यात. फुडलीं पांच वर्सां कानालाची दुरुस्ती आनी देखभालीचें काम लेगीत कंत्राटदाराकूच करचें पडटलें.
महाराष्ट्राचे हद्दींतलो सुमार 30 क्लोमिटर लांबायेचो तिळारी कानाल परतून परतून नादुरुस्त जाता. हाचो परिणाम गोंयांतल्या उदका पुरवणेचेर जाता. ह्या कानालांची दुरुस्ती करप गरजेचें आसा. गोंया वरींच महाराष्ट्रांत लेगीत कानालाचे वटेन काँक्रिटीकरण जाल्ल्यान कानालाक वेंरो वचपाचें बंद जातलें. तिळारी करारा प्रमाण महाराष्ट्राचे हद्दींतले दुरुस्तीचो 70 टक्के खर्च गोंय सरकाराक दिवचो पडटलो. कुडाशेंच्या तिळारीच्या फुटिल्ल्या कानालाची दुरुस्ती बेगिनूच पुराय करून उदक पुरवण सुरळीत करचे खातीर यत्न चल्ल्यात, अशें मुख्यमंत्री डॉ. सावंत हांणी सांगलें.
साळ बांदाचें काम मे मेरेन पुराय
साळांतल्या शापोरा न्हंयेंत साळ बांदाचें (बॅरेज) काम 31 मे मेरेन पुराय जातलें. ताका लागून बार्देस, दिवचल आनी पेडणें म्हालाक फायदो जातलो. सध्या ह्या बांदांतल्या उदकाच्या सांठ्याची तांक वाडोवपाचें काम चालू आसा. ह्या प्रकल्पा खातीर 281 कोटी रुपयांचो खर्च जातलो. तातूंत बॅरेज कोटी, जॅक वेल 46 कोटी, पंप हावस 55 कोटी जाल्यार चांदेलांत उदकाची पायपलायन घालपाक 24 कोटी, ह्या कामांचो आस्पाव आसा. बांदांत तिळारी धरणांतलें अतिरिक्त उदक तशेंच धरणांतल्यान जावपी उदकाचो विसर्ग सांठयतले, अशें मुख्यमंत्र्यान सांगलें.
बांदाची तांक 250 एमएलडी आसा. तातूंतलें 150 एमएलडी उदक आमठाणे धरणांत सोडटले. जाल्यार 100 एमएलडी उदकाची चांदेल, मोपा आनी धारगळे पुरवण करतले. ह्या बांदाची सांठो तांक 500 एमएलडी मेरेन व्हरपाचो आमचो हांवेस आसा. ताका लागून फुडारांत कांय कारणांक लागून तिळारी धरणाचे दुरुस्ती खातीर उदका पुरवण बंद जाली जाल्यार थंय सांठयल्लें उदक हो दुसरो पर्याय थारतलो. हें उदक आमठाणें धरणांत सोडून फुडें अस्नोडें, गिरी, पिळर्ण आनी बार्देस म्हालांत व्हरपाक मेळटलें, अशें मुख्यमंत्री डॉ. सावंत हांणी स्पश्ट केलें.
नव्या कामाक लागून बांदाची सांठो तांक वाडटली. ताका लागून थंय उदकाची पातळी वाडली जाल्यार कोणाचेंच पुनर्वसन करचें पडचें ना. आमी न्हंयेदेगेर राखणे वणत बांदपाचें काम सुरू केलां. हे आदींच्या बांदाक खूब खांबे आशिल्ले. ताका लागून पावसाच्या दिसांनी उदकाक आडखळ जावन हुंवार येतालो. नव्या बांदांत अश्यो आडखळी नात. ताका लागून पावसाळ्यांत लेगीत उदक सहज व्हांवून वचपाक शकतलें. थंयच्या लोकांनी गैरसमजाक बळी पडचे न्हय, असो उलो मुख्यमंत्री डॉ. सावंत हांणी मारलो.
महाराष्ट्राच्या मुख्यमंत्र्यांक मेळटलोः डॉ. सावंत
महाराष्ट्राचे हद्दींतले कानाल दुरुस्त करपा संबंदांत आमच्या उदकस्रोत खात्यांतल्या अधिकाऱ्यांनी महाराष्ट्रांतल्या अधिकाऱ्यां वांगडा उलोवणी चालू केल्या. ते उपरांत आपूण आनी मंत्री सुभाष शिरोडकार महाराष्ट्राचे मुख्यमंत्री देवेंद्र फडणवीस हांकां मेळटले. ह्या वेळार आमी तिळारी संबंदांत संयुक्त बसका घेवपा विशीं लेगीत चर्चा करतले, अशें मुख्यमंत्री डॉ. सावंत हांणी सांगलें.
लाटंबार्से उद्देगीक वसणुकेक उदका पुरवण
आमठाणे धरण वाठारांतलीं विवीध कामां आनी थंयच्या गेस्ट हावासाच्या नुतनीकरणा खातीर 20 कोटी रुपया खर्च केल्यात. फुडारांत हें धरण पर्यावरणाचे नदरेन विकसीत करपाचो आमचो विचार आसा. ह्या धरणांतलें उदक पंप आनी शुद्ध करून लाटंबार्से उद्देगीक वसणूक तशेंच साळ आनी मेणकुरें गांवांक दितले, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
