भांगरभूंय | प्रतिनिधी
नवी दिल्ली, खबरां संस्था ः भारतांतले लाखांनी लोक उच्च रगतदाब, गोडेंमूत आनी फॅटी लिव्हर सारक्या दुयेंसांनी जियेतात. विशेश म्हळ्यार तांकां हे विशीं कसलीच कल्पना लेगीत नासता. अपोलो हॉस्पिटलाच्या ‘हेल्थ ऑफ द नेशन-2025’ अहवालांतल्यान ही म्हायती उजवाडाक आयली. 2024 वर्सा हॉस्पिटलांत 25 लाख लोकांची भलायकी तपासणी जाल्ली. तातुंतल्या 26 टक्के लोकांक उच्च रगतदाब, 23 टक्के लोकांक गोडेंमूत आनी 66 टक्के लोकांक फॅटी लिव्हराची समस्या आशिल्ल्याचें कळ्ळें. पूण तांचे मदीं हाचीं कांयच लक्षणां दिसूंक नात. मद्यपान करुंक नाशिल्ल्या 85 टक्के लोकांक फॅटी लिव्हरची समस्या आशिल्ली. 45 टक्के बायलांक आनी 26 टक्के दादल्यांक रगत उणें आशिल्ल्याची समस्या दिसून आयली. 77 टक्के बायलांक आनी 82 टक्के दादल्यांक जीवनसत्व डीची उणीव आसली आनी 38 टक्के दादल्यांक आनी 27 टक्के बायलांक जीवनसत्व बी-12 उणीव दिसून आयली. हातूंत चाळीस वर्सां सकयल्या लोकांचें प्रमाण चड आशिल्लें.
कॉलेजींत वचपी भुरग्यां मदीं मोटसाण, प्री-हायपर्टेन्सिव्ह फॅटी लिव्हर लक्षणां – वायट आहार, निश्क्रीय जिणे पद्दत आनी पोटाच्या समस्यांक लागून 2.57 लाख लोकांक ह्यो समस्या दिसून आयल्यो.
रजोनिवृत्ती: तपासणी केल्ल्या बायलां मदीं रजोनिवृत्ती उपरांत गोडेंमूत जावपाचो धोको 40 टक्के, मोटसाण 86 टक्के आसा. रजोनिवृत्ती वेळार अनुक्रमान 14 टक्के आनी 76 टक्के आशिल्लें. उपरांत फॅटी लिव्हराची समस्या आशिल्ली.
मोटसाण – देशांतल्या मुळाव्या शाळेंतल्या ८% आनी कॉलेजींतल्या 28% विद्यार्थ्यांचें वजन चड आसा. तातुंतले 19% कॉलेजींतले विद्यार्थी प्री-हायपर्टेंसिव्ह आसात. हीं काळजाच्या दुयेंसाचीं मुळावी लक्षणां. ही स्थिती वायट आहार, शारिरीक हालचाल उणी, ताण हाका लागून जाता. 25 लाखांतले 61% लोक मोटसाणीचे आशिल्ले. 18% लोकांचें वजन उणें आशिल्लें.
काळजाचे दुयेंस – अहवाला प्रमाण ज्या लोकांक दुयेंसाचीं लक्षणां दिसनाशिल्लीं तांची कॅलशियमाची तपासणी केली. तातुंतल्या 46 टक्के लोकांक काळजाच्या दुयेंसाचीं सुरवातीचीं लक्षणां दिसलीं. धक्को दिवपी गजाल म्हळ्यार तातुंतले 2.5% लोक 40 वर्सां सकयले आशिल्लें.
मानसीक भलायकी: 47,000 लोकांचेर केल्ल्या सर्वेक्षणांत 6% लोकांक उदासीनताय आशिल्ल्याचें दिसून आयलें. चडशीं 40 ते 55 वर्सां पिरायेचीं बायलां आशिल्लीं. दर चार दुयेंतींतल्या एका दुयेंतीक स्लीप ॲप्नियाचो धोको चड आसा, जाचो संबंद मोटसाण आनी काळजाच्या दुयेंसांकडेन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
