भांगरभूंय | प्रतिनिधी
डोनाल्ड ट्रम्प हांची घोशणा
27 ऑगस्ट सावन लागू
भारताचेर वट्ट 50 टक्के कर
खबरां संस्था
न्यूयॉर्क : अमेरिकेचे राष्ट्राध्यक्ष डोनाल्ड ट्रम्प हांणी रशियन तेल खरेदी करपा खातीर भारताचेर अतिरिक्त 25 टक्के कर लावपाच्या कार्यकारी आदेशाचेर सय केल्या. ताका लागून अमेरिकेंत जावपी भारतीय आयातीचेर एकंदर शुल्क 50% मेरेन वाडटलें . अमेरिकेन थारायिल्ल्या सगळ्यांत चड दरांतलो हो एक जावन आसा.
नवो दर 21 दिसांत लागू जातलो, म्हणल्यार कार्यकारी आदेशांत सांगिल्ले प्रमाण तो 27 ऑगस्टाच्यान लागू जातलो.
बुधवारा, भारताच्या विदेश मंत्रालयान जाप दितना दिल्लीन रशियेंतल्यान आयात करपा विशीं आपली स्थिती पयलींच स्पश्ट केल्या अशें सांगून हो दर ‘अन्यायी, अन्यायकारक आनी अवाजवी’ आसा, अशें म्हणलें.
भारत आपल्या राष्ट्रीय हिताचें रक्षण करपा खातीर गरजेच्यो सगल्यो कारवाय करतलो, अशेंय तांणी म्हणलें.
रशियन लश्करान युक्रेनांत कितल्या लोकांक मारतात हाची भारताक पर्वा ना अशें सांगून अमेरिकेच्या राष्ट्राध्यक्षान हाचे पयलीं शुल्क वाडोवपाची शिटकावणी दिल्ली.
मजगतीं, युक्रेनांतल्या रशियन फेडरेशनाच्या कारवायांक लागून अमेरिकेची राष्ट्रीय सुरक्षा आनी परराष्ट्र धोरणाक धोको निर्माण जायत आशिल्ल्यान राष्ट्रीय आणीबाणीक जाप दिवपा खातीर खर उपाय येवजण चालीक लावप गरजेचें आसा अशें बुधवारा व्हायट हावसान सांगलें.
भारतान रशियन तेलाची आयात केल्ल्यान युक्रेनांत रशियान केल्ल्या कारवायांक जाप दिवपाचे अमेरिकेचे यत्न दुबळे जातात, अशें तातूंत म्हणलां.
रशिया कडल्यान तेल आयात करपी हेर देशांक अमेरिका सोदून काडटली आनी गरजे प्रमाण राष्ट्रपतीक अतिरिक्त उपाय सुचयतली अशें संकेत तातूंत दिल्ले.
तेल आनी वायू ही रशियेची सगळ्यांत चड निर्गत आसून मॉस्कोचे मुखेल गिरायक चीन, भारत आनी तुर्कस्थान आसात.
कांय भारतीय वस्तूंक करांतल्यान सूट
एप्रील 2025 त जारी केल्ल्या दुसऱ्या आदेशांत ज्या कांय उत्पादनांक आदींच टॅरिफांतल्यान सूट दिल्ली, तांकां सूट दितले. ह्या वस्तूं मदीं सेमीकंडक्टर, स्मार्टफोन, कंप्युटर, वखदां निर्मिती, ऑटोमोटिव्ह भाग, काशें आनी हेर धातू तशेंच मिनाचो आस्पाव आसा.
विदेश मंत्रालयाची अमेरिकेक जाप
आमी बाजार परिस्थिती प्रमाण तेल खरेदी करतात आनी ताचो उद्देश 140 कोटी भारतीयांची उर्जा सुरक्षा सुनिश्चीत करप. अमेरिका भारताचेर अतिरिक्त कर थापता हें सामकेंच दुर्दैवी. हेर साबार देश लेगीत स्वताच्या हिता खातीर अशेंच करतात. आमी परतून सांगतात, हीं पावलां अन्यायाचीं, बेकायदो आनी चुकीचीं आसात. भारत आपल्या राष्ट्रीय हितांचें रक्षण करपा खातीर गरजेचीं सगलीं पावलां उखलतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
