भांगरभूंय | प्रतिनिधी
भांगरभूंय | प्रतिनिधी
पणजी : कोंकणी भाशेक राजाश्रय आसा. मुख्यमंत्री सदांच आदाराक मुखार आसता. कोंकणी भाशेक बरे दीस येता आनी येतलें, अशें राजभास संचालनालयाचें उपसंचालक अनिल सावंत हांणी म्हणलें. तें 25व्या युवा कोंकणी साहित्य संमेलनाच्या समारोपा वेळार उलयतालें.
ह्या वेळार माचयेर मानाचे सोयरे म्हूण गोवा कोंकणी अकादमीचे उपाध्यक्ष रमेश घाडी, वाळपयची नगराध्यक्ष सौ. प्रसन्ना गांवस, सांखळीची नगराध्यक्ष सिद्धी प्रभू पोरोब, गोवा कोंकणी अकादमीचे अध्यक्ष पुर्णानंद च्यारी, युवा संमेलन अध्यक्ष हेमंत अय्या, मुखेल समन्वयक फडगो गांवकार, येवकार अध्यक्ष काशिनाथ नायक, कार्याध्यक्ष गोपिनाथ गांवस, दत्तराज नायक आनी हेर मानेस्त हाजीर आशिल्लें.
2 दीस हें संमेलन व्हडा दबाज्यान जालें. ह्या दोन दिसांत विद्यार्थ्यांचो, सर्तकांचो, साहित्य मोगींचो, गांवतल्या लोकांचो मोटो प्रतिसाद मेळ्ळो.
गोवा कोंकणी अकादमी, सरकारा कडल्यान युवा साहित्यिकांक खुबश्यो संदी मेळटात, त्यो घेवच्यो, आमी दिवपाक केन्नाय तयार आसता. तुमी फुडें येना जाल्यार आमी कशें दितलें, कोणाक म्हूण दितलें, अशें पुर्णानंद च्यारी हांणी म्हणलें.
विद्यार्थी म्हूण संमेलनांत वांटेकार जावपी हांव आयज अध्यक्ष म्हूण सगल्यां मुखार आसा. तेन्ना माटवांत एखादो फुडलो अध्यक्ष आसा, ताका आतांच येवकार दिवया म्हूण सांगून युवा कोंकणी साहित्य संमेलनांतल्यान साहित्यिक वावर मुखार व्हरपी तयार जाता म्हूण संकेत दिलें.
गोपिनाथ गांवस हांणी समेस्त गांवकारांचें, आयोजना खातीर मुखेल आदार दिवपी पीएमश्री सर्गस्त हिरोजीराव बाबूराव देसाई सरकारी माध्यमीक विद्यालयाच्या पालक-शिक्षकांचें, गांवकारांचे, तशेंच लोकमांड घालपी बायलां संस्थांचें उपकार मानलें. हेर मानेस्तांची, तशेंच संमेलना खातीर घेतिल्ल्या सर्तींचें परिक्षण करपी, तशेंच विद्यार्थ्यांक मार्गजर्शन करपी परिक्षकांची आनी कार्यशाळेंत वांटो घेवपी विद्यार्थ्यांची उलोवपा
जाली. समारोपा वेळार संमेलन येसस्वी करपा खातीर मोलादीक योगदान दिवप्यांचो भोवमान केलो. तशेंच संमेलना खातीर घेतिल्ल्या सर्तिंच्या जैतिवंतांक इनामां भेटयलीं.
26वें युवा कोंकणी साहित्य संमेलन गोंय विद्यापिठांत
26वें युवा कोंकणी साहित्य संमेलन गोंय विद्यापिठांत जातलें म्हूण 25व्या युवा साहित्य संमेलनाच्या
समारोपा वेळार घोशणा जाली. ठाणें सत्तरींत जाल्लें साहित्य संमेलन सगल्या आंगान परिपूर्ण आनी बरें
जालें, तेन्ना गोंय विद्यापिठा मुखार फुडलें साहित्य संमेलन आनीक बरें करपाचें आव्हान आसा, अशें 26व्या
युवा साहित्य संमेलनाची येजमानकी स्विकारतना गोंय विद्यापिठाचे शिक्षक डॉ. हनुमंत चोपडेंकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
