भांगरभूंय | प्रतिनिधी
कोलकाता, खबरां संस्था ः अस्तंत बंगाल शाळा सेवा आयोगान (WBSCC) स्थापन केल्ली शालेय शिक्षकां खातीर 2016 वर्साची पुराय भरती समिती कोलकाता उच्च न्यायालयान सोमारा रद्द केली. हाका लागून 24 हजार शिक्षकांच्यो नोकऱ्यो गेल्यो. नोकरभरतींत भानगड जाल्ल्यान ही कारवाय केल्या.
सुनावणी वेळार न्यायाधीश देबांगसू बसाक आनी मोहम्मद शब्बर रशिदी हांच्या खंडपिठान सांगलें, बेकायदेशीर रितीन (रिकाम्या ओएमआर शीट) भरती केल्ल्या शाळेच्या शिक्षकांनी चार सप्तकां भितर मेळिल्लो पगार परत करचो. ह्या शिक्षकां कडल्यान पयशे वसूल करपाचें काम जिल्लोधिकाऱ्यांक दिला. रद्द केल्ल्या भरती समितींत बंगालांतल्या वेगवेगळ्या राज्य सरकारान प्रायोजीत आनी अनुदानित शाळांनी 2016 वर्सा WBSC प्रवेश परिक्षे वरवीं भरती केल्ल्या सगळ्या शिक्षक आनी बिगर शिक्षक कर्मचाऱ्यांच्या नेमणुकांचो आस्पाव आसा.
तशेंच भरती प्रवेश परिक्षेच्या 23 लाख ओएमआर शीट्सचे (टेस्ट पेपर) परतून मूल्यमापन करपाचो आदेश खंडपिठान दिला. कांय अपीलदारांनी आदेश स्थगीत करपाची विनंती न्हयकारली. तशेंच नेमणूक प्रक्रियेची फुडली चवकशी करून तीन म्हयन्यां भितर अहवाल सादर करपाचो निर्देश खंडपिठान सीबीआक दिला. तशेंच डब्ल्यूबीएसएससीक नवी भरती प्रक्रिया सुरू करपाक सांगलां.
उच्च न्यायालयान 20 मार्चाक ह्या प्रकरणाची सुनावणी पुराय केल्ली आनी खंडपिठान आपलो निकाल राखून दवरिल्लो. न्यायालयाच्या आदल्या आदेशा प्रमाण सीबीआय हे प्रकरणाची चवकशी करीत आसा. ह्या घोटाळ्या कडेन कथित संबंद आशिल्ल्याचो आरोप करून फेडरल एजन्सी कडल्यान बंगालचो आदलो शिक्षण मंत्री पार्थ चॅटर्जी हाका 2022 वर्सा अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
