भांगरभूंय | प्रतिनिधी
नवी दिल्ली, खबरां संस्था ः 23 ते 35 वर्सां पिराये मदीं खास करुन टायप 2 गोडेंमूत आशिल्ल्या तरणाट्यांमदीं हिपॅटायटीस, फॅटी लिव्हर आनी सिरोसिस सारकें यकृताचे दुयेस वाडत आसात. तज्ञांच्या म्हणण्या प्रमाण गोडेंमूत जाल्ल्या दुयेंतींक यकृता संबंदीत दुयेंस वाडप हें हुस्क्याचें कारण आसून ताचेर वेळार उपचार करप गरजेचें आसा. तरणाट्यां मदीं नॉन-अल्कोहोलिक फॅटी लिव्हर डिसीज (NAFLD) आनी लिव्हर सिरोसिस ही प्रकरणां वाडत आसात. गोडेंमूत यकृताक लुकसाण करता, यकृताचेर जखमा (फायब्रोसिस) जातात आनी सारकें वेवस्थापन करूंक ना जाल्यार सिरोसिस जाता अशें तज्ञ म्हणटात. देखून यकृताचें दीर्घकाळ लुकसाण जावचें न्हय आनी जिणेचो दर्जो सुदारपा खातीर वेळार तपासणी करप, जिणे पद्दतींत बदल करप, गोडेंमूताचेर नियंत्रण दवरप गरजेचें आसता.
यकृत प्रत्यारोपण आनी एचपीबी सर्जन डॉ. विभा वर्मा म्हणटा, मोटसाण, गोडेंमूत, फॅटी लिव्हर आनी उच्च कोलेस्टेरॉल ह्या दुयेंसांचो आंकडो दिसानदीस वाडत आसा. मेटाबॉलिक डिसफंक्शन-अॅसोसिएटेड लिव्हर डिसीज (MASLD) हाका लागून यकृताचे दुयेंस (सिरोसिस, यकृताची जखम) जावंक शकता आनी वेळार उपचार केलो ना जाल्यार यकृताचो कॅन्सर जावंक शकता. सुरवातीच्या काळांत हे दुयेंस आडावंक मेळटात आनी बरे लेगीत करूं येतात. तरणाट्यांमदीं यकृताचे दुयेंस वाडपाचीं कांय कारणां जिणे पद्दतीकडेन संबंदीत आसात जशीं चड काळ एकाच सुवातेर बसप, शारिरीक हालचाल उणी करप, फावो ती न्हीद मेळना, खावपाची संवय (अल्ट्रा-प्रोसेस्ड फुड, आहारांत कार्बोहायड्रेटांचें प्रमाण वाडप) आनी व्यसन (सोरो पिवप) अशीं आसात.
नॉन-अल्कोहोलिक फॅटी लिव्हर डिसीज (NAFLD) हीय एक हुस्क्याची गजाल आसून ताचो परिणाम यकृताचेर जाता. 50% तरणाट्यांमदीं रगतांतली साकर उणी आशिल्ल्याची दिसून येता. गोडेंमूत आशिल्ल्या तरणाट्यां मदीं यकृताच्या समस्यांत सुमार 20 टक्क्यांनी वाड जाल्या. म्हयन्या भितर यकृत निकामी जाल्ल्या 10 दुयेंतींतल्या 5 दुयेंतींक गोडेंमूत जाता आनी वजन नियंत्रण दवरप, पोशक आहार खावप, दिसपट्टो व्यायाम करप असो सल्लो दितात. गोडेंमूत आशिल्ल्या मनशांक यकृताचे समस्या जावचे न्हय म्हूण जिणे पद्दतींत वेळार बदल करप म्हत्वाचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
