भांगरभूंय | प्रतिनिधी
खबरां संस्था
बंगळुरूः अंदूच्या आयपीएल सिझनांत विराट कोहली बऱ्या फॉर्मांत आसा. हे सर्तीच्या सुरवेच्या 6 मॅचींत ताणे चार अर्द शेंकडे केल्यात. ऑरेंज कॅपीचे सर्तींत तो तिसरे सुवातेर आसा. फाफ डू प्लेसिसाक दुखापत जाल्ल्यान विराट रॉयल चॅलेंजर्स बंगळुरू (आरसीसीबी) पंगडाचें नेतृत्व करता. मात राजस्थान रॉयल्स आडचे बंगळुरूंत चिन्नास्वामी स्टेडियमचार आयतारा जाल्ले मॅचींत मात विराटाक पयल्याच बॉलार आवट जालो.
राजस्थान रॉयल्सा वतीन ट्रेन्ट बोल्ट पयली ओव्हर घालतालो. विराटा कडेन स्ट्रायक आशिल्लो मात बोल्टाचो भितर येवपी बॉलाचेर ताचो अदमास चुकलो आनी तो ताच्या पॅडाक लागलो आनी अंम्पायरान ताका एलबीडब्ल्यू दिलें. बोल्टाच्या सुरवेच्या ओव्हरींनी धांवड्यो काडप सोपें आसना. ह्या आयपीएलांत ताणे दोन फावट पयले ओव्हरींत दोन विकेटी घेतिल्ले कडेन आसात.
आयपीएलांत विराट दुसरे फावट मॅच सुरू जातगीर पयल्याच बॉलाचेर आवट जाला. पोरूंच्या आयपीएलांत सनरायझर्स हैदराबादच्या स्पीनर जगदीसन सुचितान ताका आवट केल्लें. विराट कोहलीचो 23 एप्रील हो दीस आयपीएलाच्या रेकॉर्डांत सामको वायट आसा. 2012च्या सिझनांत हे तारखेक तो पययल्याच फावट आयपीएलांत खेळल्लो. राजस्थाना आडचे मॅचींत ताणे 16 बॉलांत फकत 16 धांवड्यो केल्लो. 2013 वर्सा पुणे वॉरियर्सां आड ताणे 9 बॉलांत 11 धांवड्यो केल्लो. 2017 वर्सा केकेआर आनी 2022 वर्सा हैदराबाद आड गोल्डन डकाचेर तो आवट जाल्लो. आतां परत एक फावटतो गोल्डन डकाचेर आवट जाला. म्हणल्यार 23 एप्रिलाक विराट सेगीत तिसरे मॅचींत गोल्डन डक थारला आनी नाका ती हॅट्रीक तांणे आपल्या नांवार केला
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
