भांगरभूंय | प्रतिनिधी
रामलल्लाच्या येवपा वांगडाच आपलें भुरगें जल्माक येवपाचें जोडप्यांची इत्सा
अयोध्या, खबरां संस्था ः देशभरांत 22 जानेवारीक अयोध्यांत जावपी राम मंदिर उक्तावण सुवाळ्याची चर्चा सुरू आसा. पूण दुसरे वटेन हे निमतान अयोध्येंत कितें तरी वेगळेंच घडटा. 22 जानेवारीक रामलल्ला वांगडा भुरग्याक जल्म दिवपा खातीर गुरवार बायला शस्त्रक्रिया (सिझेरियन डिलिव्हरी) करपाक तयार आसात अशें हॉस्पिटलांनी अर्ज येत आसात. देखून हॉस्पिटल प्रशासनाक ताचेर कितें करचें असो प्रस्न आसा.
इंडिया टुडेच्या खबरे प्रमाण, अयोध्याच्या प्रसूती हॉस्पिटलांनी जोडप्यां कडल्यान व्हड प्रमाणांत अर्ज येवपाक लागल्यात. ज्या बायलांची डिलिव्हरीची तारीख 22 जानेवारीच्या लागीं आसा अश्या बायलांनी 22 जानेवारीकच आपली डिलिव्हरी जावन आपल्या भुरग्याचो ते दीस जल्म जावचो अशी विनंती करून अर्ज दाखल करपाक सुरवात केल्या. रामलल्लाच्या येवपा वांगडाच आपलें भुरगें जल्माक येवचें अशी इत्सा हें जोडप्यांनी उक्तायला. ते खातीर ही जोडपी शस्त्रक्रिया करून बाळंतपण करपाक तयार आसा अशें हॉस्पिटलान सांगलां.
“दर दिसा आमकां हॉस्पिटलाच्या लेबर रूमांतल्या 14- 15 जोडप्यां कडल्यान 22 जानेवारीक डिलिव्हरी करपाची अशें अर्ज येता. अशे स्थितींत सामान्य पद्दतीन बाळंतपण करप शक्य ना. हाचे खातीर तांकां शस्त्रक्रिया करची पडटली अशें आमी तांका स्पश्ट केलां. हॉस्पिटलान आतां मेरेन 22 जानेवारीक 35 शस्त्रक्रिया करपाची येवजण आंखल्या. आमी दिसाक फकत 14 ते 15 शस्त्रक्रिया करता” अशी म्हायती खात्याची मुखेली डॉ. सीमा द्विवेदी हांणी दिली.
फाटलीं शंबर वर्सां आमी राममंदिराची वाट पळयतात. निमाणो तो खिण आयलो आनी 22 जानेवारीक उक्तावण जातले. देखून “आमच्या भुरग्याक ह्या संवसारांत येवपा खातीर हो एक खूब शुभ योग आसतलो”, अशी एका गुरवार बायलेन प्रतिक्रिया दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
