भांगरभूंय | प्रतिनिधी
मुख्यमंत्रीः सांखळी मतदारसंघांतल्या देवळांनी साबार कार्यावळी
भांगरभूंय । प्रतिनिधी
दिवचलः कितलीशींच वर्सां ज्या खिणाची आमी वाट पळयताले, तो खीण आतां लागीं पावला. अयोध्येंत श्रीराम जल्मभुंयेंत भव्य देवळांत प्रभू श्रीराम हांचे मुर्तीची 22 जानेवारीक प्रतिश्ठापना जातली. ती पळोवपाची संद सगळ्यांक ऑनलायन उपलब्ध करून दितले. हें राष्ट्र मंदीर आसा. तातूंत श्रीराम बसतले. ताका लागून त्या दिसा गोंयांत दिवाळी मनयात, रोशणाय करून आपलो वाठार पर्जळीत करात तशेंच दरेकल्यान आपापल्या देवळाची नितळसाण करची, अशें मुख्यमंत्री डॉ. प्रमोद सावंत हांणी सांगलें.
सांखळी मतदारसंघांत शार तशेंच गांवगिऱ्या वाठारांतल्या सगळ्या मुखेल देवळांनी श्रीराम मुर्ती प्रतिश्ठापने निमतान धर्मीक आनी सांस्कृतीक कार्यावळींचें आयोजन केलां. पाळी, वेळगें, सुर्ल, आमोणें, कुडणें, न्हावेली, हरवळें आनी सांखळी शारांतल्या मुखेल देवळांनी खाशेल्या कार्यावळींचें आयोजन केलां. ह्या कार्यावळींचें आयोजन येसस्वी तरेन जावचे हे खातीर सांखळेच्या रवीन्द्र भवन सभाघरांत खाशेले बसकेचें आयोजन केल्लें. ह्या वेळार मुख्यमंत्री हांणी पुराय कार्यावळी विशीं खोलायेन म्हायती दिली आनी हाजीर आशिल्ल्यांक मार्गदर्शन केलें.
ह्या वेळार जिल्हो पंचायत वांगडी गोपाळ सर्लकार, नगराध्यक्ष रश्मी देसाय, सरपंच कामत, कालिदास गांवस, कृष्णा गांवस, अंकुश मळीक, राजन पाळकार, शिवदास मुळगांवकार, गुरुप्रसाद नायक, देवस्थान अध्यक्ष, मुध्याध्यापक, शिक्षक आनी राम भक्त व्हड संख्येन हाजीर आशिल्ले.
ज्या जेश्ठ श्रेश्ठ नागरिकांनी श्रीराम मंदीर जावचें म्हूण कश्ट घेतले, तांकां मान मेळपाक जाय. हे खातीर सगळ्यांत पयली श्रीराम मंदीर पळोवपा खातीर गोंयांतल्या जेश्ठ नागरिकांक संद दितले, अशें मुख्यमंत्र्यांन सांगलें. तशेंच विवीध विशयांचेर मार्गदर्शन केलें. पाळी, सुर्ल, कुडणें, आमोणें, न्हावेली, वेळगें, हरवळें आनी सांखळी शारांतल्या मुखेल देवळांनी सकाळच्यान विवीध धर्मीक आनी सांस्कृतीक कार्यावळी देवळाचे पुरयत, देवस्थान अध्यक्ष आनी शिक्षणीक संस्थांच्या मार्गदर्शना खाला जातल्यो. तातूंत श्रीराम हांचे जिणेचेर आदारीत कार्यावळी जातल्यो, अशेंय तांणी सांगलें. गोपाळ सुर्लकार हांणी येवकार दिलो.
मतदारसंघांत कार्यावळी, महाप्रसादाचें आयोजन
मतदारसंघांतल्या सगळ्या मुखेल देवळांनी धर्मीक कार्यावळ जाले उपरांत महाप्रसादाचें आयोजन केलां. सांजे वेळार गांवांतल्या दरेका देवळांत दिव्यांचो उत्सव जातलो. तशेंच दरेकल्यान आपल्या घरार आकाशदिवो लावन, पणट्यो पेटोवन दिवाली मनोवची, असो उलो मुख्यमंत्री डॉ. प्रमोद सावंत हांणी गोंयकारांक मारला.
22 जानेवारीक भौशीक सुटी
प्रभू श्रीराम हांचो मुर्ती प्रतिश्ठापना सुवाळो दरेकल्याक अणभवपाक मेळचो हे खातीर भौशीक सुटी जाहीर केल्या. ते खातीर सगळ्या शिक्षकांनी आनी विद्यार्थ्यांनी कार्यावळींत वांटो घेवप गरजेचें आसा. आंगणवाडी ते उच्च शिक्षीत विद्यार्थी ह्या कार्यावळींनी वांटो घेतले.
दरेका गांवांत खास कार्यावळ समितीची निवड
सांखळी मतदारसंघांत श्रीराम मुर्ती प्रतिश्ठापना सुवाळ्या निमतान दरेके कडेन खास कार्यावळ समिती वेंचल्या. घराघरांनी आमंत्रण दिलां. कसलेच तरेचें राजकारण करिनासतना गांवांत उत्सव मनयतले. दरेकल्याक हे कार्यावळीचें निमंत्रण दिला, तेन्ना सगळ्यांनी हे कार्यावळीक येवचें. राम हो सगळ्यांचोच. तो फक्त भाजपाचो असो समज कोणे करून घेवचो न्हय, असो सूर बसकेंत आयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
