भांगरभूंय | प्रतिनिधी
भारताची कॉमनवॅल्थ 2022 सर्तींतली तोखणायेची कामगिरी
खबरां संस्था
बर्मिंगहॅमः जागतीक पांवड्या वयली म्हत्वाची ‘मल्टी स्पोर्ट्स इव्हेंट’ म्हणल्यार राष्ट्रकूल सर्त. जाका इंग्लिशींत ‘कॉमनवॅल्थ गेम्स’ अशें म्हणटात. 1930 पसून जावपी ह्या सर्तींनी भारतान फाटल्या कांय वर्सांत दोळे दिपकावपी कामगिरी केल्या. 2010त 101 पदकां सयत भारतान दुसरी सुवात मेळयिल्ली. अंदूं 61 पदकां जिखून भारत चवथे सुवातेर आसा. भारतांन वट्ट 61 पदकांचेर अंदूं नांव कोरांतलां. हातूंत 22 भांगरां, 16 रुप्यां, 23 कांश्यां पदकांचो आस्पाव आसा. अंदूंचें सर्तींत कांय नव्या खेळगड्यां सयत नामनेच्या खेळगड्यांनीय पर्जळीत कामगिरी केली. पूण भारत सगल्यांत येसस्वी थारिल्ली शुटींग सर्त अंदूं कॉमनवॅल्थांत नाशिल्ल्यान भारताच्या पदक तकट्याचेर व्हड फरक पडला, अशें आसतनाय भारतान चवथी सुवात मेळयल्या.
सगल्यांत चड पदकां कुस्तींत
अंदूं भारताच्या कॉमनवॅल्थ सर्तींत वांटो घेतिल्ल्या सगल्या कुस्तीपटूंनी पदकां जिखल्यात. ताका लागून भारतान सगल्यांत चड पदकां कुस्ती खेळांत जिखलीं. हातूंत 6 भांगरां, 1 रुप्यां आनी 5 कांश्यां पदकांचाे आस्पाव आसा. हातूंत बजरंग पुनिया, दीपक पुनिया, रवी दहिया, नवीन हांचे सयत बायलां मदीं विनेश फोगाट आनी साक्षी मलीक हांणी भांगरां पदकां मेळयलीं. जाल्यार अंशू मलिकान रुप्या पदक मेळयलें. मोहीत ग्रेवाल, दीपक नेहरा, पुजा गेहलोट, पुजा सिहाग आनी दिव्या काकरन हांंकां कांशें पदकाचेर समाधान मानचें पडलें.
वेटलिफ्टिंगेंत भारताची सरस कामगिरी
भारतान अंदूं मेळयिल्ल्या पदकांचो विचार केल्यार कुस्ती उपरांत सगल्यांत चड पदकां वेटलिफ्टिंगांत 3 भांगरां, 3 रुप्यां आनी 4 कांश्यां पदकां सयत वट्ट 10 पदकां मेळयलीं. विशेश म्हणल्यार सर्तींतलें पयलें पदक मिराबाई चानून भांगरापदकाच्या रुपांत वेटलिफ्टिंगांत मेळोवन दिलें. मीराबाई सयत जेरेमी लालरिनुंगा, अंचिता शेउली हांणीय भांगरा पदक जिखलें. संकेत सरगर, बिंद्याराणी देवी, विकास ठाकूर हांणी रुप्या जाल्यार गुरुराजा पुजारी, विजय कुमार यादव, हरजिंदर कौर, लवप्रीत सिंह हांणी कांशें पदक जोडलें.
अॅथलॅटिक्सांत 8 पदकां
अॅथलॅटिक्सांत भारतान 8 पदकां जिखली. हातूंत 1 भांगरा, 4 रुप्यां आनी 3 कांश्यां पदकांचो आस्पाव आसा. विशेश म्हणल्यार तिट्टी उडयेंत भारतान भांगर आनी रुप्या पदक मेळयलें. एलडॉस पॉल आनी अब्दुला अबुबकर हांणी ही पदकां जिखलीं. स्टीपलचेसांत अविनाश साबळे आनी 10 किमि. चलपाचें सर्तींत प्रियांका गोस्वामी हांणी रुप्या पदक जोडलें. जाल्यार संदीप कुमारान कांशें पदक जोडलें. उंच उडयेंत एम श्रीशंकर, तेजस्वीन शंकर हांणी आनी भालाेफेकींत अन्नू राणी हिणें कांशें पदक जिंखलें.
बॉक्सिंगेंत भारताक 7 पदकां
बॉक्सींग सर्तींत भारतान 7 पदकां जिखलीं. हातूंत निखत झरीन, नितू घांघस सयत अमीत पांघलान भांगरा पदक जाल्यार, सागर अहलवाटान रुप्या आनी रोहीत टोकस, जॅस्मीन आनी मोहम्मद हुसामुद्दीन हांणी कांशें पदक मेळयलें.
टेबल टॅनिसांत 4 भांगरां पदकां
टेबल टॅनीस आनी पॅरा टेबल टॅनिसांत मेळून भारतान वट्ट 4 भांगरां, 2 रुप्यां आनी 2 कांश्यां पदकां जिखलीं. हातूंत शरथ कमल-श्रीजा जोडयेन तसेंच शरथान दादले एकोडेंत आनी दादल्या पंगडान भांगर मेळयलें, पॅरा टेबल टॅनिसपटू भाविनानूय भांगर जाल्यार सोनलबेनान कांशें पदक मेळयलें. जाल्यार शरथ – साथिया जोडयेन रुप्या पदक आनी साथियान गनसेकरान दादले एकोडेंत कांशें पदक जोडलें.
बॅडमिंटनांत भारताक 6 पदकां
बंडमिंटन सर्तींत भारतान 3 भांगरां, 2 कांश्यां आनी एक रुप्या पदक मेळयलें. हातूंत दादले, बायलां एकोडेंत अनुक्रमे लक्ष्य सेन आनी पीव्ही सिंधून जाल्यार सात्वीक आनी चिराग जोडयेन दादल्यांचे दोट्टींत भांगर मेळयलें. बॅडमिंटन पंगडान रुप्या पदक मेळयलें. त्रिसा जॉली आनी गायत्री गोपिचंद हांणी बायलांचे दोट्टींत आनी किदम्बी श्रीकांतान दादल्यांचे एकोडेंत कांशें पदक मेळयलें.
क्रिकेट-हॉकीतूय पदक
अंदूं नव्यान आस्पाव जाल्ल्या दादले आनी बायलां क्रिकेट सर्तींत भारतान रुप्या जाल्यार बायलां हॉकी पंगडान कांश्या पदक मेळयलें. लॉन बॉल्स खेळांतूय भांगरा पदक मेळयलें. ज्युडोंत सुशीला देवी आनी तुलिका मान हांणी रुप्या जाल्यार विजय कुमारान कांशें पदक जिखलें. तशेंच पॅरा वेटलिफ्टर सुधीरान भांगरा पदक जिखलें. तशेंच स्कॉश खेळांत भारताच्या सौरव घोषालान कांशें पदक आनी मिश्र फेरयेंत सौरवान दिपीका सयत कांशें पदक मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
