भांगरभूंय | प्रतिनिधी
नवी दिल्ली, खबरां संस्था ः उत्तराखंड सरकारान समान नागरी कायदो (UCC) चालीक लावपा खातीर णव वांगड्यांची समिती स्थापन केल्ली. 6 फेब्रुवारीक राज्यान प्रस्तावीत केल्लें समान नागरी कायदो विधेयक विधानसभेंत मांडलें. ह्या कायद्याच्या तरतुदीं संबंदीं म्हायती दिवपी दस्तावेज शुक्रारा अधिकृत संकेतथळार अपलोड केलां. राज्याचे आदले मुखेल सचीव शत्रुघ्न सिंह हे समितीचे अध्यक्ष आसा. ह्या तरतुदीं विशीं म्हायती दितना शत्रुघ्न सिंह हांणी सांगलें, लिव्ह इन रिलेशनशिपांत रावपी जोडप्यांची गुप्तताय ह्या कायद्या खाला राखून दवरतले. पूण 18 ते 21 वर्सां पिरायेच्या अश्या तरणट्यां विशीं तांच्या म्हायती पालकांक दितले.
शत्रुघ्न हांणी पत्रकार परिशद घेवन समान नागरी कायद्यांत केल्ल्या कांय बदलांची म्हायती दिली. लिव्ह इन रिलेशनशिप विशीं केल्ले तरतूदीचेर वाद जावपाक शकता अशें तांणी सांगलें. पूण 18 ते 21 वर्सां पिराये मदले तरणाटे पुरायपणान परिपक्व नासतात अशें आमकां दिसता. देखून तांच्या आवय-बापायक अशा संबंदाची जाणविकाय आसप गरजेचें आसा. पूण हे पिरायेच्या भुरग्यांक तांचे संबंदांची नोंद करपाक मेकळीक दिल्या. लिव्ह इन रिलेशनांत रावपी जोडप्यांनी नोंदणी केल्यार तांका सुरक्षा दितले. ते भायर फुडाराक आंकडेवारीचो नोंद दवरपा खातीरय उपेगी पडटले.
लिव्ह इन संबंदी खंयची तरतूद केल्या?
समान नागरी कायदो विधेयक राज्यांत लिव्ह इन रिलेशनशिपांत रावपी जोडप्यांक निबंधकांकडेन नोंदणी करपा सक्तीचें करता मागीर ते जोडपे उत्तराखंडांत रावपी आसूं वा नासूं, तांकां कलम 381 च्या पोटकलम (1) खाला लिव्ह इन रिलेशनशिप संबंदी म्हायती निबंधकांकडेन सादर करप सक्तीचें आसा. कलम 380 खाला उल्लेख केल्ल्या कायद्या प्रमाण लिव्ह इन रिलेशनशिपांत रावपी व्यक्ती नेण्टी आसा काय पयलींच लग्न जाल्ली आसा हाची चवकशी निबंधक करतलो. एक म्हयन्या परस चड काळ लिव्ह इन रिलेशनशिपांत आशिल्ल्या आनी नोंदणी सादर करूंक नाशिल्ल्या जोडप्यांक तीन म्हयने मेरेन बंदखण वा 10 हजार रुपया मेरेन दंड वा दोनूय ख्यास्त दिवपाची तरतूद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
