भांगरभूंय | प्रतिनिधी
पणजीः सुकणीं मोगींच्या यत्नांक लागून गोंयांत 21 वर्सां उपरांत परतून दुर्मीळ ‘रॅड नॅक फालारोप’ सुकण्याची नोंद जाल्या. 20 ऑक्टोबराक गोवा बर्ड कॉन्सर्वेशन नॅटवर्काच्या (जीबीसीएन) वांगड्यांक दर्यांत पयस ह्या थलांतरीत सुकण्याचें दर्शन जालें. हे आदीं 2003 त आनंद प्रकाश हांणी गोंयांत ह्या सुकण्याची नोंद केल्ली. फाटल्या कांय वर्सांत गोंयांत थलांतरीत सुकण्यांची संख्या उणी जायत आसा. अशे स्थितींत ह्या दुर्मीळ सुकण्याची नोंद जाल्ल्यान सुकणीं मोगीं मदीं उमेदीचें वातावरण पातळ्ळां.
हे विशीं जीबीसीएनचे अध्यक्ष ओंकार धारवाडकर हांणी सांगलें, गोंयांत दर्यांतल्या सुकण्यांची पळोवणी करपा खातीर ‘पेलाजीक’ सुकणीं निरिक्षणाचें आयोजन केल्लें. दर्यांत सुमार 10 किलोमिटर अंतराचेर गेले उपरांत आमकां स ‘रॅड नॅक फालारोप’ दिसलीं. आमकां तांचे फोटो काडपाक येस मेळ्ळें. हे आदीं देशांत कांय कडेन हें सुकणें दिशिल्लें. हीं सुकणीं चडसो वेळ दर्यांतूच आसतात. कांय खेपे तीं खूब प्रमाणार उदक आशिल्ले सुवातेचेर राबितो करतात. मेळिल्ले म्हायती प्रमाण ‘रॅड नॅक फालारोप’ हें सुकणें उत्तर अमेरिकेंतल्या आर्टीक तशेंच युरेशिया वाठारांत सांपडटा. शिंयाच्या दिसांनी ही सुकणीं चडसो वेळ दर्यांत आसतात. दर्यांतले ल्हान जीव हें तांचें मुख्य खाण. शिंयाच्या दिसांनी ही सुकणीं दक्षीण अमेरिका, अस्तंत आफ्रिका, अरबी दर्या, इंडोनेशिया, अस्तंत मलेशिया ह्या वाठारांत थलांतर करतात. तांतयां घालपाच्या काळांत ह्या सुकण्याच्या काना फाटलो भागाचो रंग तांबडो जाता. हाचे वयल्यान ह्या सुकण्याक ‘रॅड नॅक फालारोप’ अशें नांव पडलां.
आतां मेरेन गोंयांत 490 सुकण्यांची नोंद
आतां मेरेन गोंयांत 490 तरांच्या सुकण्यांची नोंद जाल्या. हे आदीं डिसेंबर 2023 त गोंयांत ‘व्हीनचॅट’ ह्या सुकण्याची नोंद जाल्ली. जाल्यार जानेवारी 2024 त ‘ब्ल्यू अॅण्ड व्हायट फ्लायकॅचर’ आनी ‘पेक्टोरल स्यंडपायपर’ हीं दोन सुकणीं दिशिल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
