भांगरभूंय | प्रतिनिधी
संवसारभर गोडेंमुताचें प्रमाण वाडतूच आसा. ‘द लॅन्सेट’ ह्या वैजकी जर्नलाच्या अभ्यासा प्रमाण, 2050 मेरेन 1 अब्जा परस चड लोकांक गोडेंमूत जातलें. हो आंकडो कॅन्सर आनी काळजाच्या दुयेंसांच्या दुयेंती परस चड आसा. गोडेंमूत हो असंसर्गजन्य रोग आसून लेगीत तो म्हामारी भशेन पातळत आसा. भारतांतय ह्या रोगाच्या दुयेंतींचो आंकडो नेटान वाडटा. देशांत गोडेंमूत दुयेंतींचो आंकडो 10 कोटी परस चड आसा.
खावपाच्यो चुकीच्यो संवयी हें ह्या रोगाची वाड जावपाचें मुखेल कारण. आतां टायप-2 गोडेंमूत टायप-1 गोडेंमुता परस चड वाडत आसा. हो एकूच रोग कुडीच्या जायत्या भागांक जाता. गोडेंमूत जाल्यार काळजाचो आताक, किडनी फेल जावप, दोळ्यांक संसर्ग जावंक शकता. मोटेपणाचो त्रास आशिल्ल्या लोकांक गोडेंमूत जावपाचो चड धोको आसता. आतां भुरगीं लेगीत ह्या दुयेंसाचीं बळी पडपाक लागल्यांत. गोडेंमुता विशीं जागृताय नाशिल्ल्यान आनी लक्षणां कडेन वेळार लक्ष दिवंक नाशिल्ल्यान ह्या रोगाचें प्रमाण वाडतूच आसा.
तज्ञांच्या म्हणण्या प्रमाण, शारांतल्या दर एका तिसर्या जाण्ट्याची साकरेची पातळी वाडटा. मजा म्हणल्यार आतां गोडेंमूत आशिल्ले चड दुयेंती 30 ते 40 वर्सां पिरायेच्या गटांत मेळटात. ह्या दुयेंसाक लागून कुडीक खूब लुकसाण जावपाक लागलां. गोडेंमूत कुडीच्या हेर भागांकूय जाता आनी ताका लागून कुडींत हेर खंयचोय रोग जावं येता.
गोडेंमूताचीं लक्षणां
जर भूक आनी तान लागपाचे पद्दतींत बदल जाता जाल्यार तीं गोडेंमुताचीं सुरवातेचीं लक्षणां जावन आसा. हातूंत मनशाक आदले परस चड तान आनी भूक लागता. व्यायाम करिनासतनाय भूक लागता. अशें आसल्यार रोखडेंच दोतोराक मेळचें. सप्तकांतल्यान एक- दोन खेपो कोणाची रगतांतली साकर वाडूं येता. पूण ती सेगीत वाडत आसल्यार आनी सकयल येना जाल्यार प्रीडायबेटिसचें लक्षण आसूं येता.
परत परत मुतूंक जावप हें किडणेच्या दुयेंसाचें, तशेंच गोडमुताचें लक्षण आसूं येता. उदक उण्या प्रमाणांत पिवन लेगीत परत परत मुतूंक जाल्यार अश्या वेळार दोतोराचो सल्लो घेवप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
