भांगरभूंय | प्रतिनिधी
नवी दिल्ली, खबरां संस्था ः संवसारभर दर दिसा स्ट्रोक दुयेंतींचो आंकडो वाडत आसा. भारतांतय स्ट्रोक दुयेंतींचो आंकडो नेटान वाडत आसा आनी लाखांनी लोकांक मरण येता. इंडियन काउन्सिल ऑफ मेडिकल रिसर्च (ICMR) संस्थेच्या सहकार्यान केल्ल्या लॅन्सेट मेडिकल जर्नलांतल्या अभ्यासा प्रमाण, भारतांत काळजाच्या दुयेंसांक आनी स्ट्रोकाक लागून येवपी मरणां नेटान वाडत आसात.
संशोधना प्रमाण, 2050 मेरेन स्ट्रोकाक लागून मरण येवपी लोकांचो आंकडो 9.7 दशलक्ष मेरेन पावूं येता. स्ट्रोकाक लागून जावपी समस्यां विशीं जागृताय करप हें सगळ्यांत म्हत्वाचें. तशेंच उच्च रगतदाब, गोडेंमूत, धूम्रपान आनी चुकीची जीण ह्या मुखेल घटकांक लागून स्ट्रोक जावपाक शकता अशें तज्ञ म्हणटात.
तज्ञांच्या मतान स्ट्रोक ही एक सामकी धोक्याची स्थिती, जाचो भलायकेचेर खोल आनी दीर्घकाळ परिणाम जाता. चड करून मेंदवाच्या कांय भागांत रगत प्रवाहांत खंड पडल्यार स्ट्रोक जाता. खंयच्याय वेळार कोणाकूय जावंक शकता जाका लागून भलायकी संस्या आनी मेंदवाक गंभीर सुकसाण जावंक शकता. उच्च रगतदाब, गोडेंमूत, मोटसाण, अल्कोहोल, उच्च कोलेस्ट्रॉल आनी धूम्रपान सारक्या वेगवेगळ्या स्वरूपात निकोटीनाचे सेवन करपी लोकांक ही स्थिती जावपाचो चड धोको आसता. हाका लागून तुमची भलायकी राखपा खातीर अतिरिक्त जतनाय घेवप म्हत्वाचें. तशेंच जिणे पद्दतींत बदल करप गरजेचें जाका लागून स्ट्रोक जावपाचो धोको उणो जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
