भांगरभूंय | प्रतिनिधी
नवी दिल्ली, खबरां संस्था ः युनिसेफाच्या अहवालांत भारतांत 2050 मेरेन ल्हान भुरग्यांचो आंकडो 35 कोटी मेरेन पावतलो असो अदमास काडला. आयच्या तुळेंत भारतांत 10.6 कोटी भुरग्यांचो उणाव जातलो तरी चीन, नायजेरिया आनी पाकिस्ताना वांगडाच संवसारांतल्या भुरग्यांच्या लोकसंख्येंत भारताचो 15 टक्के वांटो आसतलो अशेंय अहवालांत म्हणलां. पर्यावरण आनी हवामान बदलाच्या परिणामां पसून ह्या भुरग्यांची राखण करपाचे व्हड आव्हान भारता मुखार आसतले अशेंय अहवालांत म्हणलां.
युनिसेफाचो मुखेल अहवाल ‘स्टेट ऑफ द वर्ल्ड्स चिल्ड्रन २०२४: फ्यूचर ऑफ चिल्ड्रन इन अ चेंजिंग वर्ल्ड’ बुधवारा नवी दिल्लींत जाहीर जालो. तातूंत लोकसंख्येचे बदल, हवामान बदलाची संकश्टा आनी शिमेवयल्या तंत्रगिन्यानाचेर भर दिला. हो अहवाल 2050 मेरेन ल्हान भुरग्यांच्या जिविताक नवो आकार दितलो. 2050 मेरेन ल्हान भुरग्यांक हवामान आनी पर्यावरणाच्या खर संकश्टांक तोंड दिवचें पडटलें आनी 2000 वर्सा परस सुमार आठ पटींनी चड भुरग्यांक उश्णताय ल्हारांचो त्रास जातलो अशें निरीक्षण ह्या अहवालांत नोंद केलां.
संवसारभरांतली सुमार एक अब्ज भुरगीं पयलींच खर हवामानाचो त्रास सोंसतात. भुरग्यांच्या हवामान जोखीम निर्देशांकांत भारताचो 26वो क्रमांक आसा. भारतीय भुरग्यांक चड उश्णताय, हुंवार आनी वायु प्रदुशणाचो चड त्रास जाता. खास करून गांवगिऱ्या आनी उण्या उत्पन्नाच्या समाजांत आशिल्ल्यांक तो चड सोंसचो पडटा. अहवाला प्रमाण हवामान संकश्टांचो परिणाम तांची भलायकी, शिक्षण आनी उदका सारकिल्ल्या गरजेच्या स्त्रोतांचेर जातलो.
मजगतीं, ह्या अहवाला प्रमाण भारतांतली अर्दी लोकसंख्या 2050 मेरेन शारांनी रावपाक लागतली. हाचे प्रमाण फुडाराक भुरग्यां खातीर तशेंच हवामान बदला खातीर अनुकूल शार नियोजनाची गरज आसा अशेंय मत अहवालांत उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
