भांगरभूंय | प्रतिनिधी
मुख्यमंत्री : गोंय मुक्ती दीस उमेदीन
भांगरभूंय । प्रतिनिधी
पणजी : विकसीत भारत 2047 करतनाच 2037 मेरेन विकसीत गोंय करपाचो उलो मुख्यमंत्री डॉ. प्रमोद सावंत हांणी मारलो. ते गोंय मुक्तीदिसाचे सरकारी कार्यावळींत उलयताले. गोंयच्या गिरेस्त दायजाक सांबाळपाक, गोंय नितळ, सोबीत दवरपाक दरेका गोंयकारान जापसालदारकेन वागचें असोय उलो तांणी मारलो.
गोंय राज्याचो 64 वो मुक्ती दीस मनयतना आयज शिक्षणीक, साधन सुविधा पांवड्यार व्हड कामगिरी केल्या. राज्याची येणावळ हेर राज्यांचे तुळेंत चड आसा. तशेंच शेतकी, फळ उत्पादन, फूल उत्पादन, नुस्तेमारी, दूद उत्पादन, मनीसबळ प्रशिक्षण, उद्देग, भलायकी सुविधा, पर्यटन हातूंत गोंय मुखार आसा, अशें मुख्यमंत्र्यान म्हणलें.
गुलामी तशेंच परधार्जिणी मानसिकतायेक गोंयांत वाव ना. गोंयकारपण तिगोवन दवरपाक गोंयकारांनी एकचारान रावचें अशेंय मुख्यमंत्र्यान म्हणलें. गोंय विद्यापिठाच्या मैदानाचेर ही कार्यावळ जाली. सुरवात बावटो हुबोवन जाली. ह्या वेळार डॉ. प्रमोद सावंत हांणी पुलीस, उजो पालोवपी दळाचे जवान, होमगार्ड आनी विद्यार्थ्यांच्या परेडीची मानवंदना स्विकारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
