भांगरभूंय | प्रतिनिधी
नवी दिल्ली, खबरां संस्थाः भारताच्या लोकसंखेत जाण्ट्यांचो आंकडो वाडत आसा. 2011 वर्सा देशांतली 60 वर्सां वयर पिरायेची लोकसंख्या 10.16 कोटी आशिल्ली, जी 2036 मेरेन 22.74 कोटी मेरेन वाडटली असो अदमास आसा. हाचोच अर्थ वट्ट लोकसंख्येंत जाण्ट्या लोकसंख्येचो वांटो 8.4% वयल्यान 14.9% मेरेन वाडटलो, आनी दर 7 भारतीयां मदीं 1 भारतीय ज्येश्ठ नागरीक आसतलो.
ही म्हायती केंद्रीय गृह राज्यमंत्री नित्यानंद राय हांणी लोकसभेंत लेखी जापेंत दिली. देशांतल्या जाण्ट्यांचो आंकडो वाडत वता तसो भलायकी, समाजीक सुरक्षा, अर्थीक अवलंबन आनी डिजिटल सुविधांचो वापर हांचे नदरेन तांकां आव्हानां वाडत आसात अशें तांणी सांगलें.
नव्या अहवालांनी हाका ‘विरोधाभास’ अशें म्हणलां. जाण्ट्या लोकांचो आंकडो वाडत आसा, पूण समाजाचें विचार, जापसालदारकी आनी तांच्या काळजी विशीं अपेक्षा पयलीं सारकी ना. हाचो थेट परिणाम जाण्ट्या लोकांच्या काळजी आनी स्वाभिमानाचेर जावपाक लागला.
जाण्ट्यांच्यो गरजो मतींत घेवन सरकारान 1 एप्रील 2021 सावन अटल वयो अभ्युदय येवजण (AVYAY) लागू केली. हे येवजणे खाला देशभरांतल्या ज्येश्ठ नागरिकांक मजत आनी सेवा दितात. तशेंच सरकारान नॅशनल कावन्सिल ऑफ सिनियर सिटीझन्स ही संस्था स्थापन केल्या अशें गृह राज्यमंत्री हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
