2031 मेरेन भारतीय अर्थवेवस्था 6.7 ट्रिलियन डॉलरांचेर

भांगरभूंय | प्रतिनिधी

भांगरभूंय । खबरां संस्था
नवी दिल्ली ः भारताची अर्थवेवस्था सध्या 3.4 ट्रिलियन डॉलर आशिल्ली ती अर्थीक वर्स 2030-31 मेरेन दुपेटीन वाडून 6.7 ट्रिलियन डॉलर जावपाची आसा. रेटिंग एजन्सी एस अँड पी ग्लोबल हांणी भारतीय अर्थवेवस्थे विशींच्या अहवालांत म्हत्वाचे मुद्दे मांडल्यांत. तशेंच भारताची अर्थवेवस्था 2023-24 ते 2030-31 मेरेन वर्सुकी 6.7 टक्क्यांनी वाडतली अशेंय तांणी सांगलां.
भारताची दर मनशा फाटली येणावळ (पर कॅपिटा इन्कम) 2031-32 वर्सा मेरेन 4500 डॉलर आसतली, जी सध्या सुमार 2500 डॉलर आसा. फुडाराक उदरगत नेटान करपा खातीर कामगारां मदीं बायलांचो वांटो खूब म्हत्वाचो आसा. 2021-22 अर्थीक वर्सा वट्ट कामगार बळांत बायलांचो वांटो फकत 24 टक्के आसा. अहवाला प्रमाण भारताची सेवा निर्यात हे देशाचे अर्थीक वाडीचें सगळ्यांत ‘व्हडलें इंजिन’ जावपाचें आसा. अर्थीक सेवांचेर जावपी खर्च 280 अब्ज डॉलरां वयल्यान 670 अब्ज डॉलर वाडटलो अशें एस अँड पी ग्लोबलानय अहवालांत सांगलां.
एस अँड पी ग्लोबलाच्या म्हणण्या प्रमाण, स्टार्टअपांत वेंचर कॅपिटल निधी 2030 मेरेन दुपेटीन वाडपाचो आसा. विद्युत वाहनां, अंतरिक्ष तंत्रज्ञान, कृत्रीम बुद्धिमत्ता, ड्रोन रोबोटिक्स आनी निवळ तंत्रगिन्यानाचो वेवसायांक फुडल्या वर्सांनी चड फायदो जातलो. ह्या दशकाच्या निमाणे मेरेन भारताच्या सरासरी जीडीपी वाडींत 6.7 टक्क्यांनी 53 टक्के वांटो ह्या क्षेत्रांतल्या भांडवल प्रवाहाक लागून जातलो अशें अदमास आसा.
अन्नधान्याचेर गिरायकांचो खर्च 615 अब्ज डॉलरांतल्यान 1.4 ट्रिलियन डॉलर मेरेन वाडटलो. खरें म्हणल्यार ही भारतीय अर्थवेवस्थे खातीर एक बरी खबर. हाचे आदीं मॉर्गन स्टॅनली कंपनीन भारताक इमर्जिंग मार्केटच्या वळेरेंत उबारून दवरला, जाल्यार चीनाचो दर्जो उणो केला. मॉर्गन स्टॅनलीन भारताचें रेटिंग ओव्हरवेट वाडयलां.