भांगरभूंय | प्रतिनिधी
‘व्हिजन काणकोण’ संबंदी काणकोणा जाली बसका
काणकोण: काणकोणच्या निमाण्या व्यक्तीची उदरगत हें ध्येय नदरे मुखार दवरून 2030 मेरेनचो उदरगत आराखडो तयार करतलों. हातूंत शिक्षणीक, सामाजीक, शेती, खेळां, कला, हस्तकारागिरी, लघुउद्देग, साधनसुविधा ह्या विशयां वांगडा वट्ट 11 विवीध विशय घेतले. ह्या विशयांत खरपणान लक्ष दवरून ह्या विशयांची आवड आशिल्ल्यांचीच नियुक्ती करतले. ‘व्हिजन काणकोण’ हे वरवीं काणकोणचे उदरगतीचो आराखडो तयार करतले. ह्या कामांत काणकोणच्या नागरिकांक साथ दिवची, असो उलो काणकोणचे आमदार तशेंच सभापती रमेश तवडकार हांणी दिलो.
‘व्हिजन काणकोण’ म्हळ्यार काणकोणचे फुडले उदरगती संबंदी काणकोणच्या विवीध मळावेल्या मानेस्तांक आपोवन तांचे कडल्यान सुचवण्यो जाणून घेवपाचे बसकेंत सभापती तवडकार उलयताले.
देळें-काणकोण हांगच्या श्री मल्लिकार्जून आनी चेतन मंजू देसाय म्हाविद्यालयाच्या सभाघरांत जाल्ले हे बसकेक नगराध्यक्ष सायमन रेबेलो, मल्लिकार्जून म्हाविद्यालयाच्या कार्यकारिणीचे अध्यक्ष चेतन देसाय, प्राचार्य डॉ. मनोज कामत, उपाध्यक्ष के. बी. नायक गांवकार हाजीर आशिल्ले.
‘व्हिजन काणकोण’ हे संकल्पनेचे मार्गदर्शक प्राचार्य डॉ. मनोज कामत हांणी विवीध 11 मळांचेर कशें काम करूं येता हे संबंदी आपलो अहवाल सादर केलो. ह्या 11य विशयांत विवीध मानेस्तांची समिती तयार केली. हातूंत अरुण भट, विठोबा देसाय, सम्राट भगत, विकास भगत, संतोष नायक गांवकार, शिरीष पै, अॅड. धर्मेश वेर्णेकार, अॅड. प्रतिभा गणे, जनार्दन भंडारी, प्रशांत नायक, शिवराम नायक गांवकार, शांताजी नायक गांवकार, हेमन्त कामत, उल्हास पै भाटीकार, अजय लोलयेंकार, रमाकांत नायक गांवकार, शंबा देसाय, विशाल देसाय, गास्पार कुतिन्हो, सायमन रेबेलो, संदेश तेलेकर, चन्द्रलेखा मेस्त्री, सुभाष महाले, कुशवंत भगत, शाबा नायक गांवकार, अजित पैंगीणकार, बबेश बोरकार, अजय पागी, रत्नाकर धुरी, दिवाकर पागी, भूषण पभुगांवकार, कमलाकर म्हाळशी, हेमंत नायक गांवकार आनी हेरांची निवड केली. ह्या सगळ्या समितींची फुडली बसका फुडल्या सप्तकांत जावन ते आपआपल्या विशयांतले अहवाल सादर करतले.
हे बसकेचें सुत्रसंचालन सिद्धार्थ देसाय हांणी केलें. मानेस्तांक सनिजा देसाय, ज्योती नायक गांवकार हांणी फुलां भेटयलीं. हे बसकेक साबार राजकीय पक्षाचे कार्यकर्ते, पदाधिकारी पक्षीय राजकारण कुशीक दवरून हाजीर रावले.
काणकोणचो पर्यटन उद्देग वाडपाक जाय. भायले लोक येवन हांगा उद्देग करतात. उद्देग करपाक ते आपल्या गांवांतल्यान लोक हाडटात. हाचो फायदो गांवच्या लोकांक जायना. राजबाग हांगा आशिल्ल्या ललित रिसोर्टचोय फायदो काणकोणकारांक व्हडा प्रमाणांत जायना. तो जावपाक जाय. ट्राईफेड संस्थे वतीन ट्रायबल वाठारांतल्या वस्तुंची विक्री करपाचे आनी कारखाने उबारपाचे नदरेन 7 कोटी रूपयां मेरेन अनुदान मेळटा. केंद्र सरकाराच्या विवीध येवजण्यां वरवींय काणकोणची उदरगत करूंक येता. ताका लागून यत्न करतलों. करमल घाटाचेर येरादारी गचमुड्डी जायत आसता. ताचे कितेंय उपाय काडपाक जाय. काणकोणा आयआयटी सारक्यो शिक्षणीक संस्था येवपाक जाय, अशें रमेश तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
