भांगरभूंय | प्रतिनिधी
प्रदेश भाजपाध्यक्ष दामोदर नायक हांच्या वाडदिसा तांकां शुभेत्सा भेटोवपाक पणजे गर्दी जाल्ली. भिरांत आशिल्ली खेटाखेटींत चार पांच जाणांक दुखापत जावपाची. समीर दयानंद मांद्रेंकार हाणें सगल्यांक सांबाळून घेतना 2027 त 27 आमदारां भितर हांव आसतलों ही देख घालून दिली. नवो इतिहास घडयतना प्रदेश भाजपाक कार्यालयाचीं दारां व्हड करपाची गरज पडची न्हय.
33 टक्के राखीवतेंतल्यान 12 अस्तुरी आमदार विधानसभेंत पावोवपाक प्रदेशाध्यक्ष तयार जातात. तें तांच्या वाडदिसा हाजेरी लावपी अस्तुरेन दाखोवन दिलें. पंरपरीक साडयेतली, आधुनीक भेसांतले अस्तुरे वांगडा. ज्येश्ठ भाजपा पदाधिकारी दत्ता खोलकार, कुंदा चोडणकार, गोविंद पर्वतकार आशिल्ले.
प्रदेशाध्यक्ष जाले उपरांत भाजपाच्या प्रदेशाध्यक्षांचो वाडदीस एखाद्रो फुलांमुकूट घेवन आयलो ना, पूण पक्षाक जैता कडेन व्हरपाक बळगें दिवपी. पयसुल्ल्यान पळयल्यार प्रदेश भाजपाध्यक्ष मुकुटा लागीं पावल्यात हें दिसतालें. गोंय भाजपा मुखेल कार्यालयांतलो आदले संरक्षण मंत्री, मुख्यमंत्री मनोहर पर्रीकार हांचो हांसपी फोटू मार्गदर्शी, थाकाय दिवपी. मुख्यमंत्री डाॅ. प्रमोद सावंत, भाजपा प्रदेशाध्यक्षांक तोच फोटू याद करून दितलो उत्पल मनोहर पर्रीकार हांकां विधानसभेंत व्हरपा पासत. 2027 त 27 भाजपा आमदारां मदीं उत्पल आसतलोच ही जतनाय घेतल्यार जैत कोण आडायतलो? आदले आमदार दयानंद सोपटे आशिल्लेच. सकाळीं आदले मुख्यमंत्री लक्ष्मीकांत पार्सेकार सरांनी हॅपी बर्थ डे केल्लें. तांच्या घरा लागीं रावपी आदल्यो आमदार संगीता परब आपलो पूत अर्जूनाक भाजपाचीच वाट दाखयतल्यो ? प्रदेश भाजपा कार्यालयांत प्रदेशाध्यक्षांच्या वाडदिसा प्रदेश काँग्रेसीचे आदले भांडारी, उपाध्यक्ष, युवाध्यक्ष, युवांक पळोवन अजाप दिसलें ना.
2027 ची विधानसभा वेंचणूक लागीं येतना देशांत, गोंयांत काँग्रेसीक नवे अध्यक्षय मेळत. तांकां मुळांची म्हायती आसत पूण 2027 त 27 चे गणीत कशें कळटलें? तेखातीर दोन तीन वर्सां लागतात, अर्थकारण समजून घेवचें पडटा. एक वेंचणुकेंत आतां समाजकारण, अर्थकारणच न्हय नितीशास्त्रय आसतलें, बदला कडेन व्हरतलें. लोकशायेंतल्या चौथ्या खांब्याक एक चौकट घालपाची वेंचणूक आयोगान नेमावळ केल्या, ते नेमावळीक एक वेंचणूक कायदो बळ दितलो.
2027 चे गोंय विधानसभा वेंचणुके आदीं प्रधानमंत्री नरेंद्र मोदी केरळ, अस्तंत बंगाल, बिहार, उत्तराखंड, गोंयांतय येवन वतले. भाजपान उदरगत केल्या, उदरगती कडेन वतना चुको जातल्योच त्यो फुडारांत सुदारतले ही गवाय दिवचे ना अशें न्हय. युवांची कुशळटाय वळखुपाक शिकात, तांकां आडावं नाकात, चुकल्यार वाट दाखयात ही तांची शिकवण. इश्टांनो, स्वातंत्र्य दिवपाक आमी कालय आशिल्ले, आयजय आसात पूण आमकांच आमचे इश्ट बदनाम करुंक सोदतात तेन्ना तांचे कडेन थोडो तेंप आमकां फाट करचीच पडटा ही मोदीजींची देख. विदेशनिती जागोवपाक आमकां कळटा पूण तांणी आमच्या घराक उजो घालपाचें थारयलां जाल्यार आमी शिमेर राखणेदळां दवरल्यांत हो रकाद तांचो.
कोण आसत 2027 वेंचणुकेतले नवे, कालचे? निमाणी, पयली खेप म्हणत तांचेच कायदे फुडें गेले तरी हालीं सगल्या राजकी पक्षांतल्या भाई, भाऊंक विसर पडटा. अशा वेळार अळंग कुशीक सरून मार्गदर्शक जावन उजवाडाचो दिवो दाखोवपीय आसतात. उमळशीक सगल्यांक 2027 त मुख्यमंत्री कोण आसतले? आदीं कोण लोकांक कळयतलो? उपमुख्यमंत्र्यांक एके वेंचणुकेंत मानाची सुवात कायद्यान मेळपाक तजवीज जावची.
भौशीक बांदकाम मंत्री दिगंबर कामत, कला आनी संस्कृती मंत्री रमेश तवडकार हांकां खातीं दितना समाजकल्याण मंत्री सुभाष फळदेसाय हांकां चडावत खातें दिलां. हेर मंत्र्यांच्या खात्यांनी ल्हान, व्हड बदल दसऱ्या मेरेन जावचे. वाडत वचपी पिराय कांय वेळार दुस्मानय थारता तेन्ना भौशीक कार्यावळींनी न उलोवप बरें. उलयल्यार बरोवन हाडिल्लें वाचतना घुस्पागोंदळ जावंक शकता.
काळखा, उजवाडांत भोंवपी, येवपी सगलींच ल्हारां खोस दिवपी नासत. व्हड ल्हार मूळ ना करपीय आसत, व्हडांचेर दिवचीच. ल्हानांक जापसालदारकी दिल्यार तो, ती शिकता. शिकतना तांकां सोरो, सिगार, तंबाकू नाका अशे सांगत रावात, मनीसपण जागोवपाचें, राखपाचें शिक्षण दियात. शिक्षणीक क्रांती, बदलाचें वारें हाडपाक सरकार फाटीं ना, वेळार बदल चालीक लागल्यार नवीं ल्हारां येतलीं. बदल पक्षाच्या पांवड्यार आयल्यात तेच वारें वेंचणुकेंत उरतलें अशी आस्त बाळगुया. रों रों वारें आयल्यार कोण उरतले, कोण पडटले हें कळचेंय ना. त्या वाऱ्याक आडावंक तरणाट्यांक, तीन ते चार उत्तराधिकाऱ्यांक भाजपा संद दिवपाची शक्यताय आसा. तें गणीत जिखपाचेंच न्हय बदलाक आमी येवकार दितात, बदल जावपाक जाय हें सांगपी.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
