भांगरभूंय | प्रतिनिधी
वाडदिसा निमतान हरवळेच्या श्री देव रुद्रेश्वर देवळांत केलो अभिषेक
दिवचलः भाजपाचे प्रदेशाध्यक्ष दामू नायक हांणी आपल्या वाडदिसा निमतान हरवळेच्या श्री देव रुद्रेश्वराचो अभिषेक करून आपल्या दिसाची सुरवात केली. दर वर्सा वाडदीस मनयतालोच, पूण हे खेपे वाडट्या जापसालदारकेक लागून आपलो वाडदीस व्हड प्रमाणांत पाक्षाच्या कार्यकर्त्याच्या फुडाकारान मनयता. देव श्री रुद्रेश्वराक अभिषेक करून येवपी विधानसभा वेंचणुकेंत भाजपाक 27 सात 27 हो नारो खरो जावची अशी प्रार्थना केली अशें दामू नायक हांणी सांगलें.
भाजपाचे नवे कार्यकर्ते, अणभव आशिल्ले कार्यकर्ते आनी पदाधिकारी एकठांय हाडून 2027 वर्सा 27 जागे जिखपाचो आमचो संकल्प आसा. हें साध्य करपा खातीर आमी श्री देव रुद्रेश्वरा कडेन प्रर्थनी केल्या अशें दामू नायक हांणी सांगलें. तशेंच गोंयकांरांच्या सुख आनी समृध्दी खातीरुय प्रार्थना केल्याचे तांणी सांगलें.
ह्या वेळार मुख्यमंत्री डॉ. प्रमोद सावंत, तांची घरकान्न सुलक्षणा सावंत, राज्यसभा खासदार सदानंद शेट तानावडे, आदले मंत्री दयानंद मांद्रेकार, जयेश साळगांवकार, श्याम सातर्डेकार, आदले आमदार किरण कंदोळकार, रुद्रेश्वर देवस्थान अध्यक्ष यशवंत माडकार, भाजपा उत्तर गोंयचे अध्यक्ष दयानंद कारबोटकार, दिवचल तालुका भंडारी समाजाचे अध्यक्ष सुशांत पेडणेकार, राज्यांतल्या भंडारी समाजाचे फुडारी आनी व्हड संख्येन हाजीर रावून लोकांनी दामू नायक हांकां वाडदिसाचीं परबीं दिली.
येवपी वेंचणुकेंत दामू नायक हांचें 27 जागेचें सपन साकार करतना भाजपा सरकारा वतीन गोंयची चडांत चड उदरगत करपाची संद आमकां मेळपाक जाय. गोंयांतलें सध्याचें भाजपा सरकार केंद्राच्या विकसीत भारतांतल्या सरकारा प्रमाण विकसीत गोंय खातीर फुडें वचत आसा. हाका लागून उदरगतीची गती वाडल्या. फुडाराक ती आनीक वाडटली अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
