2027 पयलीं सगळीं घरां नांवार जातलीः मुख्यमंत्री

भांगरभूंय | प्रतिनिधी

जि. पं. वेंचणुकेच्या प्रचारा निमतान इंदिरानगर- चिंबल सभेंत आस्वासन

भांगरभूंय । प्रतिनिधी
पणजीः चिंबला 20 कलमी आनी हावसिंग बोर्डाचीं घरां काँग्रेसीन मोडपाक घेतिल्ली. पूण भाजप सरकारान ‘म्हजें घर’ येवजणे खाला घरा नांवार करपाक सुरवात केली. 2027 पयलीं चिंबलांतलीं सगळीं घरां नांवार जातली अशें आश्वासन मुख्यमंत्री डॉ. प्रमोद सावंत हांणी दिलें.
जिल्हो पंचायत वेंचणुकेच्या प्रचारा निमतान इंदिरानगर- चिंबल सभेंत संबोधित करतना मुख्यमंत्री, डॉ. प्रमोद सावंत उलयताले. ह्या वेळार थळावे आमदार रुडोल्फ फर्नांडीस, झेडपी उमेदवार गौरी कामत, चिंबलाचे सरपंच संदीप शिरोडकार आनी हेर पंच वांगडी हाजीर आशिल्लें.
काँग्रेस सत्तेत आसतना चिंबला 20 पॉयंट आनी हावसिंग बोर्डाचीं घरां मोडपाक आयिल्लें. पूण तेन्नाची आमदार व्हिक्टोरीया फर्नांडीस (मामी) हांणी तांकां विरोध केलो ती घरां वाटयली. आतां तिचो पुत रुडोल्फ फर्नांडीस भाजपात येवन म्हजे घर येवजणे खाला घरां वाटोवपा खातीर फुडे सरलां, अशें मुख्यमंत्र्यान म्हणलें.
चिंबलाच्या चार पंचांनी म्हाका सांगला, तांच्या प्रभागांतल्यांन सगळ्या बुथांचेर 80 टक्के मतदान हे भाजपाक जातलें. देखून हे वेंचणुकेत कमळाक मत मारात, 2027त पसून कमळाक मत मारात आनी जितली घरां अनियमित आसात ती सगळीं घरां रुडोल्फ नांवार करून दितलो, अशें आश्वासन मुख्यमंत्र्यान दिलें.
20 पॉयंट आनी हावसिंग बोर्डाचीं घरां आशिल्ली ती दुसऱ्याक विकल्यांत. जी लोकांनी ही पयलींची घरां विकती घेतल्यांत तांचेच नांवार ही घरां म्हजे घर येवजणे खाला जातली. पयलींचे धनी आतां आपली कागदपत्रां लावन विकिल्ली घरां नांवार करपाक लागल्यांत. पूण हाचे पयलीं कोणी घरां विकल्यांत तांचे नांवार ही घरां जावची ना, अशें मुख्यमंत्र्यान स्पश्ट केले.
काँग्रेसीक जात आनी धर्मा भितर झगडीं लावपाची सवय आसा. देखून जांणी म्हजें घर येवजणेक विरोध केलो तांकां धांवडावन घालात. तुमी कमळाक मत मारात आनी 2027 पयली तुमकां घरां कायदेशीर करून दितां, अशे मुख्यमंत्र्यान म्हणलें