भांगरभूंय | प्रतिनिधी
मुख्यमंत्री : प्रचारसभेंत चिंबलाकारांक आस्वासन
पणजी : चिंबला 20 पॉयंट आनी हावसींग बोर्डांतलीं घरां काँग्रेसीन मोडपाक हातांत घेतिल्लीं, पूण भाजप सरकारान ‘म्हजें घर’ येवजणे खाला घरां नांवार करपाक सुरवात केली. 2027 पयलीं चिंबलांतलीं सगलीं घरां नांवार जातलीं, अशें आस्वासन मुख्यमंत्री डॉ. प्रमोद सावंत हांणी दिलें.
जिल्हो पंचायत वेंचणुकेच्या प्रचारा निमतान इंदिरा नगर चिंबलां आयोजीत सभेंत मुख्यमंत्री डॉ. सावंत उलयताले. ह्या वेळार थळावे आमदार रुडोल्फ फर्नांडीस, जिल्हो पंचायत उमेदवार गौरी कामत, चिंबलाचे सरपंच संदीप शिरोडकार आनी हेर पंच वांगडी हाजीर आशिल्ले.
काँग्रेस सत्तेंत आसतना चिंबलां 20 पॉयंट आनी हावसींग बोर्डांतलीं घरां मोडपाक आयिल्ले, पूण तेन्नाची आमदार व्हिक्टोरिया फर्नांडीस (मामी) हांणी ताका विरोध केलो आनी तीं घरां वाटायलीं. आतां तिचो पूत रुडोल्फ फर्नांडीस भाजपांत येवन ‘म्हजें घर’ येवजणे खाला घरां वाटोवपा खातीर फुडें सरला, अशें मुख्यमंत्र्यान म्हणलें.
चिंबलाच्या चार पंचानी म्हाका सांगलां, तांच्या प्रभागांतल्यान सगल्या बुथांचेर 80 टक्के मतदान हें भाजपाक जातलें. हे वेंचणुकेंत कमळाक मत मारात, 2027 त लेगीत कमळाक मत मारात आनी जितलीं घरां अनियमीत आसात, तीं सगलीं घरां रुडोल्फ नांवार करून दितलो, अशें आस्वासन मुख्यमंत्र्यान दिलें.
20 पॉयंट आनी हावसींग बोर्डांतलीं घरां कांय जाणांनी दुसऱ्याक विकल्यांत, जीं लोकांनी हीं पयलींचीं घरां विकती घेतल्यात तांच्याच नांवार हीं घरां ‘म्हजें घर’ येवजणे खाला जातलीं. पयलीचे धनी आतां आपलीं कागदपत्रां लावन विकिल्लीं घरां नांवार करपाक लागल्यात, पूण हाचे पयलीं कोणी घरां विकल्यात तांच्या नांवार हीं घरा जावचीं ना, अशें मुख्यमंत्र्यान स्पश्ट केलें. काँग्रेसीक जात आनी धर्मा भितर झगडीं लावपाची संवय आसा. देखून जांणी ‘म्हजें घर’ येवजणेक विरोध केलो तांकां दारांत आयल्यार धांवडावन घालात, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
