भांगरभूंय | प्रतिनिधी
मुख्यमंत्रीः दामू नायक हांचो राजकी प्रवास कवतुकाचो
भांगरभूंय । प्रतिनिधी
पणजीः भाजप युवा मोर्चाचे अध्यक्ष ते भाजप प्रदेशाध्यक्ष हो दामू नायक हांचो राजकी प्रवास कवतुकाचो आसा. दामू नायक हांणी आतां मेरेन पक्षांतल्या खूबश्या म्हत्वाच्या पदांचेर काम केलां. ते खातीर तळागाळांतल्या भाजप कार्यकर्त्यां कडेन तांचे बरे संबंद आसात. ताचो व्हड फायदो फुडारांत भाजप संघटन वाडोवपा खातीर जातलो. 2027 चे विधानसभा वेंचणुकेंत भाजप 27 सुवातो जिखतलो, असो ठाम विस्वास मुख्यमंत्री डॉ प्रमोद सावंत हांणी उक्तायलो.
भाजपाचे नवे प्रदेशाध्यक्ष म्हूण दामू नायक हांच्या नांवाची घोशणा करचे खातीर शेनवारा पणजे आयोजीत केल्ले कार्यावळींत मुख्यमंत्री उलयताले. आदले प्रदेशाध्यक्ष सदानंद शेट तानावडे हांणी केल्ले दर्जेदार कामगिरीक लागून भाजप दोन खेपे जिल्हो पंचायत वेंचणूक जिखलो. 2022 चे विधानसभा वेंचणुकेंत येस मेळ्ळें. तशेंच हेर वेंचणुकांनीय भाजपाक घसघशीत येस मेळ्ळें. पेडणें सावन काणकोण मेरेनच्या वाठारांनी भोंवून पक्ष संघटन वाडोवचे खातीर तानावडे हांणी जे पद्दतीन काम केलें, तशेंच काम दामू नायक हे लेगीत करतले, अशें मुख्यमंत्री डॉ. सावंत हांणी सांगलें.
‘लोकसभेच्यो दोनूय सुवातो जिखपाची मोख’
येता ते 2027 चे विधानसभा वेंचणुकेंत भाजपाचे 27 आमदार वेंचून हाडपाचो आमी निश्चेव केला. तशेंच 2029 चे लोकसभा वेंचणुकेंत दोनूय मतदारसंघ जिखपाची मोख दवरल्या. ते खातीर दामू नायक हांणी आतां सावनूच मडकय सयत वेळ्ळी, बाणावली, नुवें ह्या सारक्या मतदारसंघांत लेगीत संघटन वाडोवपाचेर आनी नवे नवे कार्यकर्ते जोडपाचेर भर दिवचो, असो सल्लो मुख्यमंत्री डॉ. प्रमोद सावंत हांणी दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
