भांगरभूंय | प्रतिनिधी
मुख्यमंत्र्यांचो दामू नायक हांकां आदार दिवपाचो उलो
विकसीत गोंया खातीर भाजप सरकार गरजेचें
दामू नायक हांचो वाडदीस उमेदीन
भांगरभूंय । प्रतिनिधी
मडगांव : विकसीत भारत 2047 आनी विकसीत गोंय 2037 हें फक्त भाजप सरकारूच करपाक शकता. भाजप सरकाराक परतून सत्तेर हाडचे खातीर दामू नायक हांकां कार्यकर्त्यां सयत लोकांनी आदार दिवचो. लोकांच्या आदाराचेर 2027 त परतून भाजपाचें डबल इंजीन सरकार सत्तेर येतलें आनी तीच दामू नायक हांकां भेट आसतली, अशें मुख्यमंत्री डॉ. प्रमोद सावंत हांणी सांगलें.
भाजप प्रदेशाध्यक्ष दामू नायक हांच्या वाडदिसा फातोड्डेंचे कार्यावळीक मंत्री सुभाष शिरोडकार, मंत्री दिगंबर कामत, नरेंद्र सावयकार, आमदार दाजी साळकार, सर्वानंद भगत, क्लियोफात डायस हांचे सयत कार्यकर्ते हाजीर आशिल्ले.
ह्या वेळार मुख्यमंत्र्यान सांगलें, दामू नायक हांणी आपल्या वाडदिसाची सुरवात ही रुद्रेश्वराच्या देवळांत पुजा, अभिशेक करून केली. ते उपरांत दीसभर भाजपाचे कार्यकर्ते आनी बऱ्या मागप्यांनी तांकां शुभेत्सा दिवचे खातीर गर्दी केली. तातूंतल्यान सगल्यांचो दामू नायक आनी भाजपा वयलो मोग दिसता. भाजप सदांच आत्मनिर्भर भारत आनी स्वयंपूर्ण गोंय ह्या प्रधानमंत्री नरेंद्र मोदी हांच्या व्हिजना प्रमाण अंत्योदय, सर्वोदय आनी ग्रामोदय ह्या तत्वाचेर काम करता. ताका लागून भाजपाचें सरकार आयज सत्तेर आसा.
गोंयची उदरगत खऱ्या अर्थान 2014 त भाजप सत्तेर येत सावन जाल्या. डबल इंजिनाचें सरकार परतून एकदां सत्तेर हाडचे खातीर सगलेच यत्न करतले. भाजप सरकार परतून सत्तेर हाडून दामू नायक हांकां गिफ्ट दिवचें, अशें मुख्यमंत्री डॉ. सावंत हांणी सांगलें.
गोंयांत आनी देशांतल्यान आतां भाजपाचें राज्य सासणाचें उरतलें आनी नव्या पर्वाची ही सुरवात आसा. ते खातीर कार्यकर्त्यांनी पक्षाचें काम सेगीत करीत रावचें, अशें मंत्री सुभाष शिरोडकार हांणी सांगलें. गोंयांत 2027 त 51 टक्के मतां घेवन भाजप सरकार सत्तेर येवचें हे खातीर दामू नायक हांणी निश्चेव केला. तांच्या वाडदिसा निमतान लोकांचो मेळिल्लो तेंको पळयत जाल्यार हो निश्चेव पुराय जातलो, अशें मंत्री दिगंबर कामत हांणी सांगलें.
51 टक्के मतां मेळोवपाचो निश्चेव : दामू नायक
गोंयांत भाजपाची सत्ता चवथे खेपे हाडपाची शक्त दी, अशें आपणे गणपती कडेन मागलां. आत्मनिर्भर भारत आनी स्वयंपूर्ण गोंय करचे खातीर 2027 त 27 सुवातो हाडचे खातीर सगल्यांनी एकवटांत काम करचें. गोंयांत 51 टक्के मतां भाजपाक मेळचीं, हे खातीर यत्न करुंया. मतभेद विसरून लोकसभेंत जे तरेन काम केलें तशेंच विधानसभेंत लेगीत फक्त भाजप पक्षा खातीर काम करून जैत मेळोवया, अशें प्रदेशाध्यक्ष दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
