भांगरभूंय | प्रतिनिधी
मुख्यमंत्री : केपेंचे उदरगतीचें स्रय सध्याच्या आमदारान घेवचें न्हय
भांगरभूंय । प्रतिनिधी
केपें : 2027 विधानसभा वेंचणुकेंत 27 सुवातो जिखून येतल्यो. तातूंत 1 केपें मतदारसंघाचो लेगीत आस्पाव आसतलो आनी परतून भाजपाचें डबल इंजीन सरकार सत्तेर येतलें, अशें मुख्यमंत्री डॉ. प्रमोद सावंत हांणी सांगलें. ते फातर्पा – केप्यां केपे मतदारसंघाच्या भाजप कार्यकर्त्यांच्या मेळाव्यांत मुखेल सोयरे म्हूण उलयताले.
ह्या वेळार भाजप प्रदेशाध्यक्ष दामू नायक, आदले उपमुख्यमंत्री चंद्रकांत कवळेंकार, सर्वानंद भगत, जिल्हो पंचायत अध्यक्ष संजना वेळीप, उपाध्यक्ष सिद्धार्थ गांवस देसाय, जिल्हो पंचायत वांगडी खुशाली वेळीप, शाणू वेळीप, प्रभाकर गांवकार, सरपंच मनिषा नायक देसाय, मोहन गांवकार, प्रवित्ता वेळीप, मंडळ अध्यक्ष कृपेश वेळीप आनी हेर मानेस्त हाजीर आशिल्ले.
फाटले वेंचणुकेंत आदले आनी नव्या कार्यकर्त्यांच्या वादाक लागून केपें मतदारसंघ हातांतल्यान गेल्लो. मात 2027 त 27 कमळां फुलतलीं. तातूंतलो केपें मतदारसंघ एक आसतलो आनी ताची तयारी आयच्यानूच करतात, अशें मुख्यमंत्र्यान सांगलें.
चंद्रकांत कवळेंकार हांच्या कार्यकालांत खूबशीं उदरगतीचीं कामां जाल्यांत. जी चालना दिल्ली ती आतां पुराय जाता. हे खातीर तीं आतांच्या आमदारान केल्यात अशें जायना. सगळे गोंयकार म्हजे, हे खातीर आपूण केन्नाच भेदभाव करिनासतना काम करता. मतदारसंघांत जें काम करता तें सगळें कार्यकर्त्यां खातीर आसा, अशें डॉ. सावंत हांणी स्पश्ट केलें.
ओएनजीसी हें सेंटर केपें मतदारसंघांत आसा. तें पुराय आशियेंत फामाद जालां. ताचें स्रय प्रधानमंत्री नरेंद्र मोदी हांकां वता. ह्या वाठारांत रस्ते आनी हेर कामां जाल्यांत, ताचें स्रय गरजे भायर आमदारान घेवचें न्हय. फुडारांत जेन्ना ओएनजीसींत मोदी परतून येतले तेन्ना निश्चीत केपें मतदारसंघांत सभा घेतले. केप्यां कमळ फुलोवपाचें आसा जाल्यार सगळ्या कार्यकर्त्यांनी निसुवार्थीपणान काम करप गरजेचें आसा, सगळ्यांनी एकवटींत रावपाची गरज आसा, अशें मुख्यमंत्र्यान सांगलें.
एका काळार भाजीपाव पार्टी म्हूण सगळेच हिणसायताले. आयज तेच भाजीपाव पार्टीची तिकेट मेळचे हे खातीर वावुरतात. आदली दुस्मानकाय सोडून सगळ्यांनी एकठांय येवपाची गरज आसा. नव्या कार्यकर्त्यांनी तडजोड करप गरजेचें आसा. पक्षा कडेन गद्दारी सोंसून घेवचे नात, अशें दामू नायक हांणी सांगलें.
ह्या वाठारांत उदरगतीचीं कामां जातात, ताचीं टेंडरां आपल्या कार्यकाळांत जाल्लीं. मात कांय जाण दिशाभूल करतात. कार्यकर्त्यांनी निरशेव नासतना जिल्हो आनी पालिका वेंचणूक जिखचे खातीर काम करपाक जाय, अशें चंद्रकांत कवळेंकार हांणी सांगलें. दयेश नायक हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
