भांगरभूंय | प्रतिनिधी
नावेली प्रचारसभेंत मुख्यमंत्र्यांचें आस्वासन
भाजप करता सगल्यां कडेन समान न्याय
काँग्रेसीन फक्त लोकां मदीं घातल्या फूट
भांगरभूंय । प्रतिनिधी
मडगांव : ‘म्हजें घर’ येवजण गोंयकारांचीं घरां कायदेशीर करचे खातीर आसात. पंचायतींतल्यान अर्ज घेवन भरून दिवचें. जिल्हो पंचायत वेंचणुकेंत भाजप उमेदवारांक वेंचून दिवचे. ‘म्हजें घर’ येवजणेंतलीं घरां 2027 च्या विधानसभा वेंचणुके आदीं नियमीत करून दितले, अशें आस्वासन मुख्यमंत्री डॉ. प्रमोद सावंत हांणी दिलें.
दवर्ले प्रचारसभेंत मुख्यमंत्री डॉ. प्रमोद सावंत हांचे सयत आमदार उल्हास तुयेंकार, संकल्प आमोणकार, नरेंद्र सावयकार, उमेदवार सत्यविजय नायक, लक्ष्मी शेटकार, सर्वानंद भगत आनी हेर मानेस्त उपस्थीत आशिल्ले.
मुख्यमंत्री डॉ. सावंत हांणी सांगलें, भाजपचे उमेदवार ज्या वेळार नावेलींतल्यान वेंचून आयले, त्याच वेळार ह्या वाठारांची उदरगत जाल्या. काँग्रेसीन केन्नाच लोकांचीं कामां करूंक नात. लोकांचीं मतां घेवन सुवार्थ सादला. जात- धर्म पळयनासतना अंत्योदय तत्वाचेर भाजप उदरगत करता. काँग्रेसीन फकत जाती- धर्माचेर लोकां मदीं फूट घालपाचें काम केलां. मुस्लीम आनी क्रिस्तांव भावांचें भाजपान कितें वायट केलां तें सांगचें. सगल्यांक समान न्यायान उदरगत केल्या. भाजपान पूल, हॉस्पिटलां, शिक्षणीक संस्था आनी हेर सुविधा उबारचे खातीर कोटींनी रुपयांचो निधी खर्च केला. डबल इंजिनाचें सरकार ट्रिपल इंजीन जावचे खातीर जिल्हो पंचायत वांगडी वेंचून येवप गरजेचें आसा. लोकांचीं घरां मोडपाचो यत्न काँग्रेस करता आनी हीं घरां नियमीत करपाचें काम भाजप सरकार ‘म्हजें घर’ येवजणेंतल्यान करता. 28 फेब्रुवारी 2014 चे आदलीं घरां कायदेशीर करतले, अशेंय तांणी सांगलें.
देड वर्सांत खूबश्या तरणाट्यांक नोकऱ्यो दिवपाचें काम भाजप सरकार करता. राज्य नोकर भरती आयोग, स्टाफ सिलेक्शना वरवीं नोकऱ्यो दितले, तातूंत गुणेस्तांक नोकऱ्यो मेळटल्यो, पूण जांकां नोकऱ्यो मेळच्यो नात, तांकां लेगीत गोवा ह्युमन रिसोर्सेस कॉर्पोरेशना वरवीं आनी हेर पांच पांच हजार नोकऱ्यो दितले. ते भायर सरकाराच्या विवीध येवजण्यांतल्यान लोकांचो जावपी फायद्या विशीं मुख्यमंत्र्यान सांगलें.
गोंयांत उदरगतीचीं कामा जावचे खातीर भाजपा बगर पर्याय ना. पक्षाचो वावर घराघरा मेरेन पावयात. उदरगतीच्या नेटार नावेलींतल्या दवर्ली आनी नावेली ह्या दोनूय सुवातांचेर भाजपाचे उमेदवार वेंचून येतले, अशें आमदार उल्हास तुयेंकार हांणी सांगलें. आमदार आमोणकार हांणी सांगलें, भाजप कार्यकर्ते आनी महिला शक्त ही पक्षाची खरी शक्त आसा. ह्या नेटाचेर भाजप वेंचणूक जाखतलो. ‘म्हजें घर’ येवजण ही लोकांचीं घरां कायदेशीर करचे खातीर आसा. हाका विरोधकांनी विरोध केल्लो, हें लक्षांत दवरून मतदान करचें.
‘नावेली’ हाचे मुखारूय जिखतले : मुख्यमंत्री
नावेली मतदारसंघ हो चुकून भाजप जिखलो अशें कोणेच समजुचें न्हय. नावेली मतदारसंघ हे खेपेय जिखतले आनी ताचे उपरांतूय जिखतले. कार्याकर्त्यांच्या नेटाचेर नावेलींतली सर्वधर्मीय मतदारांची बँक भाजपा कडेन आसा. आपसांतले मतभेद विसरून कार्यकर्त्यांनी काम करचें. ग्रामीण उदरगती खातीर जिल्हो पंचायतींत भाजपाक सांगात दिवचो, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
