भांगरभूंय | प्रतिनिधी
2025 वर्सातलें विधानसभेचें विस्तारीत अदमासपत्रकी अधिवेशन (पावसाळें) सोंपतना सरकार सुदारता हें चिन्न दिसूंक लागलां.
2027चे विधानसभा वेंचणुकेंत 27 आमदार वेंचून हाडपाक भाजपा सरकारी पांवड्यार तयारी करता. वेंचणुकेंत अनुसुचीत जमातींक राजकी आरक्षण दिवंक लोकसभेची मेळिल्ली मान्यताय हो भाजपाचो प्लस पाॅयंट. देवनागरी कोंकणी हीच प्रदेशाची भास, राजभास हें सरकारान विधानसभेंत परतून एकदां सांगिल्ल्यान मतांय वाडटलीं.
कांय आदले कायदे सुदारप, नवे कायदे करपा पासत सरकारान उखलिल्लीं पावलां सरकाराक बळगें दितलीं. पंचायत, जिल्हो पंचायत, नगरपालिकांक अधिकार दिवन जापसालदार केल्यार कायदे बेगीन चालीक लागतले. विधानसभेचेर लोकप्रतिनिधी म्हणून येतना नगरपालिका, जिल्हो, पंचायत पांवड्या वेलो तळागाळांतलो अणभव म्हत्वाचो.
गोंय भाजपाचे अणभवी प्रदेशाध्यक्ष, मुख्यमंत्र्यांनी 2027चे वेंचणुकेंत पुराय भोवमत मेळोवपाची मोख दवरल्या. गोंयचें भारतीय जनता पार्टीचें सरकार परतून पुराय भोवमतान सत्तेर हाडपा खातीर मंत्रीमंडळांत बेगीन बदल जातले हें प्रदेशाध्यक्षांनी सांगलां. तेखातीर मुख्यमंत्री, भाजपाच्या प्रदेशाध्यक्षांनीय अभ्यास केला. राजभास कायद्यांत बदल करचे परस हेर अरिश्टांतल्यान गोंयाक मेकळें करप म्हत्वाचें ही जाणविकाय सरकाराक जाल्या. आदल्यो चुकी सुदारतना कायदे चालीक लागूंक नाशिल्ल्यान, अधिकाऱ्यांक दिल्ले सेवा वाडीन गोंयकार अस्वस्थ आसात.
तंत्रीक शिक्षण संचालनालय फक्त वेवसायीक अभ्यासक्रमाच्या अॅडमिशनांत अती घुस्पलां. विद्यार्थ्यांक जेईई, नीट परिक्षा म्हळ्यार कितें तें विद्यार्थ्यांक कळना जाल्यार तो दिसाळीं वाचना, टीव्ही पळयना अशें दिसता. पालक, शिक्षकां बराबरीन विद्यार्थ्यांक जेईई, नीट परिक्षे विशीं तंत्रीक शिक्षण संचालनालयान जागोवपाक जाय. जें मुख्यमंत्र्यांक कळ्ळें तें तंत्रीक शिक्षण संचालनालयाक कित्याक कळूंक ना? कोण जापसालदार हे अवस्थेक?
गोंयच्या तरणाट्यां मदीं आशिल्ली कुशळटाय सोदून काडपा पासत व्हड वावर जाला. रोजगारय मेळ्ळा. आयटीआयंत बदल जाल्यात. पाॅलिटेक्नीक म्हळ्यार पदविका इंजनियरींग अभ्यासक्रम बदलप, कांय अभ्यासक्रमांच्यो सुवातो वाडोवप, पाॅलिटेक्निकांचो पांवडो सुदारपा कडेन लक्ष दिवपाक जाय.
केंद्रीय आस्थापनांनी मुखेल करून बदली जावपी रोजगार तरणाटे घेवंक सोदना ही म्हायती सरकाराक आसा. तेंच किद्याक आयएएस पांवड्यार पावन गोंयचे नागरी सेवेंतले अधिकारी गोंय सोडूंक सोदनात हें सरकाराक खबर आसा. कंत्राटार आसूनय पन्नास टक्क्यां वयर शिक्षक बरें काम करपी ते तांकां शिक्षणाची आवड आशिल्ल्यान. कंत्राटार आशिल्ल्यान वाजेल्ल्या, पिराय वाडिल्ल्या, शिक्षणाची आवड नाशिल्ल्या शिक्षकांक व्हीआरएस दिवप बरें.
व्हीआरएस घेवनय मंत्री, आमदारांचे सेवेंत शिक्षक, अधिकारी वावुरपाक शकतात. तांची पिराय वाडल्यार तांचे कडल्यान चुकीचें मार्गदर्शन मंत्र्यांक जावपाची शक्यताय आसता.
विधानसभा अधिवेशनांत पिराय वाडिल्ल्या, भलायकेन सारके नाशिल्ल्या मंत्र्यांक जापो दिवपाक त्रास जातात. सेंट्रल एसीच्या सभाघरांत कामकाजा वेळार धा-बारां वरां बसप शक्य जायना तांकां मुख्यमंत्री डाॅ. प्रमोद सावंत हांणी सांबाळून घेतलें. तांच्याय खात्यांच्यो फायली मुख्यमंत्र्यां कडेन निमाण्या निर्णयाक पावतात. तेन्ना मुख्यमंत्र्यांक विशय कळटा तें हे विधानसभेन दाखोवन दिलें. कितलो तेंप तांकां सगल्यांक सांबाळून घेवप?
फुडलीं दोन वर्सां म्हत्वाचीं आशिल्ल्यान सगल्या आमदारांक तांच्या मतदारसंघांत चड वावुरचें पडटलें. गोंयाक सतावपी कांय विशय भाजपान, मुख्यमंत्र्यांनी सत्तेंतल्या आमदारां वरवीं मांडून घेतले. घरचो अहेर दिवपाक, आवाज वाडोवपाक भाजपाचे, सरकारांतले आमदारय फुडें रावले. आमदार विजय सरदेसाय हांची भास कांय वेळार ते सरकारा वटेन हें सांगपी.
विरोधी पक्ष फुडारी युरी आलेमांव, आमदार विरेश बोरकार कांय विशयांचेर उलयतना तांच्या हातांची, मुखामळाची भास वेगळीच आसता. तांकां अजून खूब शिकपाचें आसा. कांय विशय तांणी मांडिल्ले तांचेर सरकारान आदींच कारवाय केल्या. विशय अचूक मांडल्यार जापो दिवप सोंपें जाता. कायदे सुदारले ना, सुदारतना देशांतल्या हेर राज्यां कडेन, देश पांवड्यार कितें जाता तें कळ्ळेंच ना जाल्यार विशय मांडूनय तो सुटावो जायना. संविधान, विधानसभेच्या कामकाजाच्या नेमावळीचें पुस्तक वाचलें म्हणून जावचें ना, तें समजून घेवचें पडटा. एका उतराचे चार अर्थ लावं येतात. विशयाचो कायद्यांक धरून अभ्यास आसा? ताचो अणभव, शिक्षण कितें तें लोकांक कळटा. विधानसभेंतलो लोकप्रतिनिधींचो आवाजच न्हय तांची चलणूकय लोकां मुखार वता.
शिक्षण चड नाशिल्लो, नाशिल्ली वेवसायांतल्या गिन्यानाचो उपेग करून गिरेस्त जाता, राजकारणांत जिखूंक शकता एकदांच. दुसरे फावटी ताचे कडेन सर्त करपी धा जाण आसतले. एकदां जिखिल्लो दुसरे खेपे जिखतलोच अशें न्हय. अणभवी राजकारण्यां कडल्यान खांची कोनशे कशे सोदचे तें शिकल्यार जैत मेळटा.
शिक्षणाक गिन्यान, तंत्रगिन्यानाची जोड मेळ्ळ्यार पंचायत, नगरपालिका, म्हापालिकाय येणावळ जोडूंक शकतात. सरकारांत थिराय येतना पंचायती, नगरपालिकांक अस्थिरतायेचें गिराण लागल्यार उदरगतींत आडमेळीं येतात. त्या आडमेळ्यांतल्यान वाट काडपाक मुख्यमंत्री शिकल्यात. फुडलीं दोन वर्सां केल्ले कायदे चालीक लागतले जाल्यार पंचायती, नगरपालिकांक अधिकार दिवचेच पडटले. अस्थिरतायेच्या गिराणांतल्यान थळाव्या स्वराज यंत्रणांक भायर काडप गरजेचें.
सभापती रमेश तवडकार अणभवी आशिल्ल्यान सभापतीपदाचेर रावन तांणी मतदारसंघांत उदरगत करून घेतल्या. उपसभापती ज्योशुआ डिसोझांक तितलो अणभव नाशिल्ल्यान म्हापशें मतदारसंघ उदरगतींत फाटीं पडला. तांचे परस व्हड तांकीचे उमेदवार वेंचणुकेचे सर्तींत आसतले, थळाव्यांक मतदार लागीं करतले. तेखातीर उमेदवारांनी आतां सावन वावराक लागचें.
अनुसुचीत जमातींच्याच न्हय, हेर विशयांचेरय आमदार निलेश काब्राल विधानसभेंत उलयले. तांकां अणभव आसा, मंत्रीपद नाशिल्ल्यान मतदारसंघाक चड वेळ दिल्ल्यान ते मतदारांच्यो अडचणी मांडूंक शकले, प्रस्न सुटावे करपाक ते फाटल्यान लागपी. तांकां मंत्रीपद मेळ्ळ्यार 2027 त भाजपाक लाव जातलो.
देश पांवड्यार वेवसायांतले बदल मुख्यमंत्र्यांक कळ्ळे, उद्देग मंत्र्यांक तें कित्याक कळूंक ना? तांचींय पिराय वाडटा, पंचायत खात्यांत ते घुस्पून रावल्यात. तेखातीर उद्देगपती, उद्देजक मुख्यमंत्र्यांक लागीं आयल्यात. पर्यटनांत हेर राज्यां आयल्यांत, पर्यटन वेवसायांतले दुसऱ्या वेवसायांत वतात हें सरकाराक कळ्ळां. पर्यटनाची कूस बदलतली, कला अकादमीक नवें रूप मेळटलेंच, कला आनी संस्कृती खात्याच्यो येवजण्यो सुदारतल्यो. अनुसुचीत जमाती खातेंय बदलता, दिव्यांगय बदलतलें, इनामां आसतलींच, निरशेवणी वतली.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
