भांगरभूंय | प्रतिनिधी
अर्थमंत्री सीतारामन सेगीत आठवें फावटी करतात अर्थसंकल्प सादर
नवी दिल्ली, खबरां संस्थाः केंद्रीय अर्थमंत्री निर्मला सीतारामन 2025-2026 वर्साचो अर्थसंकल्प संसदेंत सादर करतात. सकाळीं 11 वरांचेर केंद्रीय अर्थमंत्री निर्मला सीतारमण हांच्या अर्थसंकल्पीय भाशणान अर्थसंकल्पाची सुरवात जाली. निर्मला सीतारामन सेगीत आठवें फावटी अर्थसंकल्प सादर करतात.
० राज्य सरकारांच्या सहकार्यान प्रधानमंत्री धनधान्य येवजण सरकार चालीक लायतलें. शेतकी उत्पादकता वाडोवप, विविध उत्पादनां आनी शाश्वत उदरगत साध्य करप, म्हाल साठोवपाचे पर्याय, सिंचन सुविधा आनी क्रेडिट सुविधा उपलब्ध करुन दिवप हाचेर लक्ष केंद्रीत करतले. हाचो व्हड प्रमाणांत शेतकारांक फायदो जातलो.
० तुर दाळ, उडीद दाळ आनी मसूर दाळ हांच्या उत्पादनाचेर खासा लक्ष दितले.
० मखाना उत्पादनाचेर लक्ष केंद्रीत करपा खातीर बिहारांत खाशेलें मखाना मंडळ स्थापन करतले.
० देशांत 5.7 कोटी लघुउद्योग आसात, तांतूतल्यान 7.5 कोटी लोकांक रोजगार मेळटा. लघुउद्योगांक चालना दिवपा खातीर खाशेले यत्न करतले.
० मागास वर्गांतल्या बायलां खातीर नवी येवजण चालीक लायतले. 5 लाख बायलांक ताचो लाव मेळूंक शकता. ह्या बायलांक कुशळटाय वाडोवपाचें प्रशिक्षण दितले.
० भारतीय भास पुस्तक येवजण – हें येवजणे वरवीं शाळा आनी उच्च शिक्षणाक भारतीय भाशांनी पुस्तकां उपलब्ध करुन दितले. हाका लागून विद्यार्थ्यांक ताचें विशय स्वताचे भाशेंत समजून घेवपाक सोंपें जातलें.
० विकसीत भारता खातीर न्यूक्लिअर एनर्जी मिशन – 2047 मेरेन न्यूक्लिअर एनर्जी मिशना वरवीं 100 गीगावॅट उर्जा तयार करपाचें लक्ष्य.
० किसान क्रेडीट कार्डाचेर रिणाची मर्यादा 3 लाखां वयल्यान 5 लाखा मेरेन वाडयतले.
० मेक इन इंडिया खाला खेळणी उद्देगा खातीर एक खाशेली येवजण सुरू करतले.
० दर्यांतले जैवविविधताय उदरगत येवजणे खातीर 25 हजार कोटी रुपयांची अतिरिक्त तरतूद.
० 2025 त आनीक 40 हजार नागरिकांचें घरां बांदपाचें सपन पुराय जातलें.
० सगल्या सरकारी शाळांनी आनी मुळाव्या भलायकी केंद्रांनी ब्रॉडबँड सुविधा उपलब्ध करून दितले.
० फुडल्या पांच वर्सांत पीएम रिसर्च फेलोशिप येवजणे खाला टेक्नोलॉजिकल संशोधनाक 10 हजार फेलोशिप दितले. हाचो फायदो आयआयटी आनी आयआयएमच्या विद्यार्थ्यांक जातलो.
० ल्हान आनी मध्यम उद्देग आनी नव्या उद्देजकांक नवी क्रेडिट पद्दत चालीक लायतले.
० फुडल्या सप्तकांत अर्थसंकल्पीय अधिवेशनांत नवीन कररचना विधेयक मांडटले. निर्मला सीतारमण हांणी जाहीर केलें.
० 50 नवीन पर्यटन थळां तयार जातलीं.
० कॅन्सर आनी हेर गंभीर दुयेंसांचेर उपचार करपा खातीर वापरपी वट्ट 36 गरजेच्या वखदांक मुळाव्या कस्टम ड्युटींतल्यान पुरायपणान सुट. हाचे भायर हेर स गरजेच्या वखदांक कस्टम ड्यूटींतल्यान सुट दिवन तें 6 टक्क्यां मेरेन सकयल हाडटले. सगल्या सरकारी हॉस्पिटलांनी कॅन्सर डे केअर सेंटर बांदतले.
० मोबायल फोनच्यो बॅटरी, एलईडी, एलसीडी टीव्ही, चामड्याचो वस्तू, इलेक्ट्रिक कार, देशांत तयार केल्ले टीव्हींचे पार्ट्स, भारतांत तयार केल्ले कपडे सवाय जातले.
० ज्येश्ठ नागरिकां खातीर टीडीएस मर्यादा 50 हजार रुपया वयल्यान एक लाखां मेरेन वाडयली.
० 12 लाखां मेरेनच्या उत्पन्नाचेर आयकर ना. अर्थमंत्र्यांची म्हत्वपूर्ण घोशणा.
० नवी कर रचणूक – ० ते ४ लाखां मेरेन शून्य, ४ ते ८ लाख ५ टक्के, ८ ते १२ लाख १० टक्के, १२ ते १६ लाख १५ टक्के, १६ ते २० लाख २० टक्के, २० ते २४ लाख २५ टक्के, २४ लाखां वयर ३० टक्के.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
