भांगरभूंय | प्रतिनिधी
नवी दिल्ली, खबरां संस्था ः 2025 वर्साच्या मध्या मेरेन देशभर ई- पासपोर्ट सुरू जावपाची शक्यताय आसा. 1 एप्रील 2024 दिसा पायलट प्रकल्प म्हणून हाची सुरवात केल्ली. पासपोर्ट धारकांचो डेटा सुरक्षीत दवरपा खातीर आनी डुप्लीकेशन टाळपा खातीर सरकारान हो प्रकल्प सुरु केल्लो.
ई-पासपोर्ट म्हणल्यार कितें?
ई-पासपोर्ट हो कागद आनी इलॅक्ट्रॉनीक पासपोर्ट हांचो मेळ. पासपोर्टांत रेडिओ फ्रिक्वेन्सी आयडेंटिफिकेशन (RFID) चिप आनी अँटेना वापरतात, जातूंत पासपोर्ट धारकाची वैयक्तीक आनी बायोमेट्रीक म्हायती आसता.
ई-पासपोर्ट कसो वळखुचो?
पासपोर्ट कव्हराच्या सकयल छापिल्लें ल्हान अतिरिक्त गोल्डन रंगाचें चिन्न सोदून काडून ई-पासपोर्ट वळखुपाक मेळटा.
ई-पासपोर्ट आसपाचें फायदे…
० डिजिटल सय आनी एनक्रिप्शनाक लागून डेटा कडेन छेडछाड करप अशक्य जाता.
० बायोमेट्रीक डेटा अचूक वळख सत्यापनाची खात्री करता. हाका लागून चुकीची वळख जावपाची शक्यताय खूब उणी जाता.
० जायते देश व्हिसा प्रक्रिया वा शिमो हुपपा खातीर ई-पासपोर्ट धारकांक प्राधान्य दितात. हाका लागून प्रवास करप सोंपें जाता.
सध्या नागपूर, भुवनेश्वर, जम्मू, गोंय, शिमला, रायपूर, अमृतसर, जयपूर, चेन्नय, हैदराबाद, सूरत आनी रांची हांगाचे प्रादेशिक पासपोर्ट कार्यालयां नागरिकांक ई-पासपोर्ट जारी करतात. तमिळनाडूंत ई-पासपोर्ट जारी करपाची प्रक्रिया 3 मार्च 2025 सावन सुरू जाली. 22 मार्च 2025 मेरेन राज्यांत वट्ट 20,729 ई-पासपोर्ट जारी जाल्लें. आंतरराष्ट्रीय नागरी विमान संघटणेच्या आंकडेवारी प्रमाण डिसेंबर 2024 मेरेन 174 देशांनी आनी प्रदेशांनी ई-पासपोर्ट जारी करपाची सुविधा आशिल्ली.
ई-पासपोर्ट कसो मेळोवचो?
पासपोर्ट मेळोवपाचो आसल्यार पासपोर्ट सेवेच्या अधिकृत संकेतथळ https://portal2.passportindia.gov.in भेट दिवन अर्ज करूं येता. ह्या संकेतथळार अर्ज करप सोंपें आसा. हाचे भायर तुमच्या लागींच्या पासपोर्ट सेवा केंद्राक भेट दिवन तुमी थेट पासपोर्टा खातीर अर्ज करपाकय शकतात.
ई-पासपोर्ट डेटा खंय सांठयतात?
भारत सरकार राष्ट्रीय म्हायती केंद्रा (NIC) वरवीं वेवस्थापन केल्ल्या सुरक्षीत, केंद्रीकृत डेटाबेसांत ई-पासपोर्ट डेटा सांठोवन दवरता. ई-पासपोर्टाच्या इलॅक्ट्रॉनीक चिपांत पासपोर्ट धारकाचो बायोमेट्रीक डेटा (फिंगरप्रिंट्स, तोंडाचो फोटो आनी आयरिस स्कॅन) आनी वैयक्तीक म्हायती (नांव, जल्म तारीख आदीं) आसता. अनधिकृत प्रवेश वा छेडछाड आडावपा खातीर पब्लिक की इन्फ्रास्ट्रक्चर (PKI) एनक्रिप्शनान सुरक्षीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
