भांगरभूंय | प्रतिनिधी
अंदूंची सगल्यांत भिरांकूळ दुख्खद घडणूक अहमदाबादांत घडली, थंय 12 जून दिसा अॅर इंडियाच्या विमानाक अपघात जालो. हें अॅर इंडियाचें विमान अहमदाबाद सावन लंडनाक वचपाचें आशिल्लें.
2025 वर्स भारता खातीर जायत्या कामगिरींनी भरिल्लें, पूण तातूंत जायत्यो दुखेस्त घडणुकोय घडल्यो. राष्ट्रीय राजधानी दिल्ली सावन काश्मीर मेरेनच्या घडणुकांनी पुराय राष्ट्राक हालोवन उडयलें. ह्या दुख्खाचे माळेन शेंकड्यांनी कुटुंबांचो नाश केलोच पूण सुरक्षा, गर्दी वेवस्थापन आनी आतंकवाद हांचे विशीं गंभीर प्रस्न उप्रासले. प्रयागराजांतल्या महाकुंभ मेळांतली सुमारा भायर गर्दी, जम्मू-काश्मीरांतल्या पहलगाम आतंकवादी हल्ल्या सावन अहमदाबाद विमान अपघाता मेरेन ह्या घडणुकांनी पुराय राष्ट्राक धक्को बसलो. राष्ट्राक हालोवपी 2025 वर्साच्या पांच मुखेल कार्यावळींचेर एक नदर मारुया.
29 जानेवारीक प्रयागराज जात्रेंत सुमारा भायर गर्दी सुरू जाली तेन्ना अचकीत आडखळी मोडून गर्देचो एक लोट भितर सरलो. ह्या वेळार 30 ते 37 लोकांक मरण आयलें आनी 60 परस चड जखमी जाले.
प्रयागराजा वांगडाच अंदूं नवी दिल्लीकय खावटें पडलें. 15 फेब्रुवारीक महाकुंभ मेळाक वचपी यात्रेकारांचे व्हड गर्देन नवी दिल्ली रेल्वे स्टेशनार खेटाखेट जाली.. प्लॅटफॉर्माचेर गाडयांची वाट पळोवपी गर्दी बेकायदेशीर जाली. ह्या अपघातांत 18 जाणांक मरण आयलें आनी 15 परस चड जखमी जाले.
भारताक अंदूं आतंकवादाचो क्रूर भार सोंसचो पडला. 22 एप्रीलाक काश्मीरांतल्या सुरम्य पर्यटन थळ आशिल्ल्या पहलगामच्या बैसारण देगणांत आतंकवाद्यांनी पर्यटकांचेर येथिश्ट फारपेट केलो. हल्लेखोरांनी मुखेलपणान हिंदू पर्यटकांक लक्ष्य करून तांचो धर्म विचारलो, आनी तोचेर फार मारले. ह्या घृणास्पद हल्ल्यांत 26 पर्यटकांक मरण आयलें आनी जायते जाण जखमी जाले. तशेंच थळावो मुस्लीम मार्गदर्शक आनी क्रिस्तांव पर्यटक हांकांय मरण आयलें. ह्या हल्ल्याक लागून भारत-पाकिस्तान तणाव वाडलो. पाकिस्तानांतल्या आतंकवाद्यांक लिपोवपाच्यो सुवाती नश्ट करपा खातीर भारतान ऑपरेशन सिंदूर सुरू केलें. पहलगाम आतंकवादी हल्ल्या उपरांत राष्ट्राची तिडक चडांत चड आशिल्ली.
अंदूं कर्नाटकाची राजधानी बेंगळुरूंतय भगदाड दिसून आयलें. 4 जून 2025 दिसा रॉयल चॅलेंजर्स बंगळुरू (आरसीबी) आयपीएल जैताची परब मनोवपा खातीर हजारांनी प्रेक्षक चिन्नास्वामी स्टेडियमाचे भायर जमले. अचकीत गर्दी बेकायदेशीर जाली आनी एकूच खवदळ पडलो. इकरा जाणांक मरण आयलें आनी जायते जाण जखमी जाले. उत्सवाचें वातावरण शोकांत रुपांतरीत जालें.
अंदूंची सगल्यांत भिरांकूळ दुख्खद घडणूक अहमदाबादांत घडली, थंय 12 जून दिसा अॅर इंडियाच्या विमानाक अपघात जालो. हें अॅर इंडियाचें विमान अहमदाबाद सावन लंडनाक वचपाचें आशिल्लें. अॅर इंडिया विमानाचें उड्डाण जाले उपरांत फक्त 32 सेकंदां उपरांत ताका अपघात जालो. 242 लोकां मदल्या 241 जाणांक मरण आयलें, जाल्यार मेडिकल कॉलेजीच्या वसतीघरांत आनी भोंवतणच्या वाठारांनी जमनीचेर मरण आयिल्ल्यांचो आंकडो 270-275 मेरेन पावलो. फक्त एक प्रवासी जिवो उरलो. तपासांत इंजिनाचें इंधन कटऑफ आनी तंत्रीक दोश जावपाची शक्यताय आशिल्ल्याचें दिसून आयलें. भारताच्या इतिहासांतलो हो सगल्यांत व्हडलो हवाई अपघात मानतात. विमान अपघाताची याद आयकून लोक अजूनय थरथरतात.
वर्स सोंपता म्हणसर राष्ट्रीय राजधानी दिल्लींत घडिल्ले घडणुकेक लागून सगल्यांक धक्को बसलो. हे घडणुकेंत दिल्लीच्या लाल किल्ल्या लागसार कार बॉम्ब स्फोट जाल्लो. 10 नोव्हेंबर 2025 दिसा सांजवेळार रेड फोर्ट मेट्रो स्टेशनाच्या गेट क्रमांक 1 लागसार हुंडाय आय 20 गाडयेंत अचकीत एक बळिश्ट स्फोट जालो. ह्या स्फोटाक लागून पुराय वाठार हालोवन गेलो. ह्या अपघातांत पंदरा जाणांक मरण आयलें, जाल्यार 30 परस चड जाण गंभीर जखमी जाले. गाडयेच्या बॉम्बस्फोटा फाटल्यान व्हायट कॉलर दोतोरांचें जाळें आशिल्ल्याचें उक्तें जालें. कितल्याशाच आरोपींक अटक केल्या आनी सध्या ह्या प्रकरणाची चवकशी सुरू आसा.
सत्यवान जांगळी
9923697659
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
