भांगरभूंय | प्रतिनिधी
वेपार आनी वेवसायिकतेंत बुडपी गोंयच्या राजपाटणांतली येरादारीची कोयंडी एक व्हड आव्हान. 2024 इफ्फी तेंपार पुलिसांनी ती फोडपाक केल्ले यत्न नित्य उरप गरजेचे. पणजेच्या अशीर मार्गार धांवपी बशींच्या चडांत चड उपेगाची मोख आसची. ते खातीर येरादारी खातें, पोलिसांनी एकवटान बसून उपाय सोदचे. पर्वरेच न्हय, गोंयच्या येरादारीच्या आव्हानाक राजपाटणांतल्यान नवी उर्बा 2025 वर्सा मेळची. भिवपाची गरज ना अॅक्सिडेंट, चोर, तंटे, खून, स्कॅमांचेर नदर दवरपाचो वावर तिसरो दोळो करता. तो आनीक शक्तीमान जातलो, चिड्डून, पुसून वच्चोना ही जतनाय घेवपाचें आव्हान आसाच.
आव्हानांतल्यान मुखार सरतना 2024 सोंपचे आदींच हो लेख बरयतां. वर्स नवें घेवन येतलें, दितलें नवी उर्बा हें सपन मनांत केळयत.सपनां पळयलींना जाल्यार तीं पुराय कशीं जातलीं? सपन म्हणल्यार संकल्प, संकल्पच केलेना जाल्यार? संकल्पाचें नवें रुप प्लॅनिंग, वर्सुकें, स म्हयन्याचें, तीन वर्सांचें, म्हयनाळें, सप्तकी, दिसपट्टें. खिणाखिणात जावपी बदल जितले अमास, पुनवेच्या शास्त्राक धरून आसात तितलेच विज्ञान, तंत्रगिन्यानाचेर. पानांची पानां बदलतात, सुकिल्लीं गळून पडटात. त्या पानांचो विलो लावपाचो वावर राजपाटण करता दिल्ली ते गोंय मेरेनचें. राजपाटणांतली येरादारीची कोयंडी फोडटना उपनगरांत, खोंपींनी, पडंग शेतांनी, घरांनी पयशांच्यो राशी आसतात. बोल्सांतल्यान त्यो भायर सरतात आडमार्गान येवपी जॉब स्कॅमा पासत? आदीं जाल्लें ना जॉब स्कॅम? भूंय विकप? नोकरी विकती घेवं नाकात, सायबर गुन्यांवाचे भकीक पडचे न्हय हें रातदीस सांगचेंच पडटा. नव्या वर्साच्यो शुभेत्सा दितनाय तें सांगचें. जतनाय घेयात, रस्ते रूंद जातात थंय धावं नाकात, कुशीक आडमेळीं आसात, मजगतींय आसतलीं. कित्याक आपटूचें, लुकसाण करुन घेवचें त्या आडमेळ्यांर? जापसालकी आमची, तुमची, जागें करपाची समाजाक, राजकारण्यांक. राजकारण, समाजकारणाच्या पलतडीं वचून मांडवीचीं ल्हारां तपासपाचो होच वगत. रातीच्या काळखांत न्हय दिसा उजवाडा. गाडयेंतल्यान भोंवतना न्हय घरांत बशिल्ले कडेन. नवीं यंत्रां, तंत्रगिन्यानांन तेंय सोपें केलां. मोबायल आसाच हातालागीं पूण तो कुशीक दवल्ल्यार? देवाक नमस्कार करतना यंत्र, तंत्र हातांत कित्याक घेवप? एकचित्तान वावरांत घुस्पून घेतल्यार काळखांतय उजवाड दिसता. उजवाडाचीं नवीं किरणां नवनिर्मणेक, उदरगतीचो सांगात करपी, लुकसाणेंत धुकलपी? चिंतल्यार दोन उतरां दोनशींय जातात, फाटलीं दारां उगतीं केल्यार वण्टींक दोळे आसतात तें दिश्टी पडटलें. हॅळे न्हय अनुस्वार हो आदलोच मार्ग कोंकणीक आपणावचो पडटलो. फकत दिसाळ्यांक न्हय पुस्तकांक, नेमाळ्यांक, बरोवपाक आनी उलोवपाक. तें जालां, गांवांतल्यान शारांत आयिल्ल्यान. शारांतल्यान गावांत वचपाची वाट सोंपी जाता वेसन पयस दवरल्यार. व्यसनाय नवीं, गाडयो आनी नोकऱ्यो दिवपाचीं. थंयच म्हेळ वाडटा, तो निवळ करपाची तांक आमचेमदीं आसा. कळना दुसऱ्यांक विचारून, समजून घेवन, देखी दिवन भुरग्यांक वेसनापासून पयस दवरचीं.
मांडवीच्या ल्हारांकय उजो पेटूंक शकता. तेआदीं आडांगी मंत्र्यांक धांवडायले नाजाल्यार घर पेट्टलें, तिसरो दोळोय धापूंक येता. 2025 वर्स नवी उर्बा घेवन येतलें राज्य मंत्रीमंडळ बदलाची, 2027 त 27 कडेन वचपाचो तो मार्ग. उदरगतीची जी दिका केंद्राची तीच राज्याची. महाराष्ट्र ते दिकेन पावल मारता शिटूकसाणीन. आमीय मारतले, नव्या वर्साक येवकार दितना. ल्हानाक म्हान करुन, म्हानाक ल्हान करुन, अचूक उतरांनी, अचूक निर्णयान. त्रास जातलेच थोडे पूण फुडाराक बरे. धिटाय दाखोवचीच पडटली, लाव, लुकसाणेचो विचार करून, वायट बऱ्याचो नियाळ घेवन.
उदरगत साधनसुविधांची, प्रगती मनीसबळाची सैम सांबाळून, सादूर रावन केल्यार ती तिगतली. साधनसुविधा वाडटना, तंत्रगिन्यान नवीं रुपां घेतना तापमानातले बेगीन जावपी बदल संशोधनाचे. संशोधक संशोधनाक धरून राविल्ले आसल्यार रिजल्ट ताकतिकेन मेळटले नाजाल्यार केल्लें संशोधन निरर्थक ठरतलें. संशोधनाक काळाची शीम आसची. संशोधनातल्यान मेळिल्ल्या रिजल्टांचेर निर्णयांक, निर्णय चालीक लावपाकय ताकतीक गरजेची. कळाव जाल्यार व्हड लुकसाण जावं येता.
नव्या वर्साक नवे उमेदीन येवकार दितना 2024 वर्सा केल्ले संकल्प आतांमेरेन पोरणे जाल्लेय आसत. आदल्यांक नवे रुपडें दिवन ते मुखार सरकतले, नवेय जातले. मोख दवल्ल्यार, इत्साशक्त आसल्यार ते किल्लतले, व्हड जातले, उडटले. सुदारतना, उडटना उपरासतले भलायकेचे नवे प्रस्न, प्रदुशणांतल्यान. नितळसाणीचे, कोयर वेवस्थापनाचे. उपाय, यत्नय जाल्यात, फुडाराची मोख गोंय दोन वर्सांभितर प्लास्टिकमुक्त करपाची आसची.
गोंयच्यो दर्यादेगो पर्यटनांतल्या चेंपणांतल्यान इबाडल्यात, दर्या मरणाचे जाळ जातात. जापसालदारकी चार खात्यांची, चार मंत्र्यांची, धा आमदारांची. एकवटान प्रस्न सोडोवपाचो संकल्प आसचो. भूतां नाचतात, भुतां येतात, भुतां आसात अशें म्हण्टना मोपा विमानतळाक त्रासांतल्यान आंतरराश्ट्रीय पावंडो फावो जालो. कुणबी साडी गोंयची परंपरा जावन रुप, रंग बदलत दिदीक लखपती करता. गोंयची भाजी, आंबे, पणस, लोणचीं, पापड, नुस्तें गोंयां भायर पावता. कशी जाली ती क्रांती? राज्य पावंड्यांतल्यान. एक तेंप असोय आशिल्लो गोंयांभायल्या कंपनीचे पापड, लोणचीं, मसाले दुकानांनी, मार्केटांत उण्या प्रमाणांत दिसताले. आयज दीदीक दादाचो तेंको मेळिल्ल्यान मसाले, पापड, लोणच्यांनी गोंय व्हड जाल्लें दिसता. लोणचें, पापडांचे नवे ब्रँड तयार जातात, पोरण्यांक आव्हान दिवपीय आसात. एकचार, एकामेकां कडेन उलोवपाची सांखळ बांदल्यार, शिस्तीन दरजो राखल्यार गोंय उंचायेर वतलें. मात्सो वेळ काडचो, सहकार भांडारांचीं भोंवडी करची. हुंदीर, जल्ल्यांक वतांत उडोवन सहकार भांडारांक सहकार मॉल करपाची, आॅनलायन सुविधांची मोख आसची. वाड्यावाड्यांनी न्हय पूण पाच वाड्यांर एक वेपार, वेवसाय केंद्रां, मिनी मार्केट आसल्यार नागरिकांक सोंपेपणा मेळटलीं. एखादरो कुसको आंबो आसल्यार तो कुशीक काडून सहकार मळाक उर्बा दिवंक येता खर नेमावळींतल्यान.
कायद्यान सरकारी कर्मचारी, अधिकाऱ्यांक सेवावाड मेळची. त्याच तेंपार सेवावाडीर आशिल्ल्या अधिकाऱ्यांचे सुवातेर दुसऱ्याक हाडपा पासत तयारी जावची. एका जॉब स्कॅमात आशिल्लो दितल्या, घेतल्यांचो रेवाडो सोदून काडपाचो वावर फाटलीं दोन वर्सांसावन चलिल्लो? गवाय बळिश्ट आसल्यार घोटाळे करपी परतून बंदखणेत पावतले. बंदखणींक बळगें, आत्मनिर्भरता दितना उज्यांत बंदखणी, मनीस सांबाळपाचेंय आव्हान आसा. आव्हानांचेर जैत मेळोवंक वर्स 2025 उर्बा दितलें.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
