भांगरभूंय | प्रतिनिधी
पणजीः 2025त गोंयच्या दर्यादेगांचेर 548 पर्यटकांक बुडपा पसून वाटायले. हातूंत 450 भारतीय आनी 98 परदेशी नागरिकांचो आस्पाव आसा. जाल्यार शेणिल्ल्यांक सोदप आनी हेर मजत करप हातूंत 829 पर्यटकांचो आस्पाव आसा.
दर्यादेगेर गोंय सरकारान तैनात केल्ले लायफगार्ड पर्यटकांक दर्यांत बुडपा पसून वाटायतात. 2025त लायफगार्डांक 548 पर्यटकांक दर्यांत बुडपा पसून वाटावपाक येस मेळ्ळें. उत्तर गोंयच्या कळंगुटे दर्यादेगेर 103, बागा 68, सिकेरी 61. जाल्यार दक्षीण गोंयांतल्या कोलवा 55, पालोळे 50, मोबोर 38 आनी अगोंडा 35 पर्यटकांक वाटायले. वडटाना वाटायल्ल्या परकी परदेशी पर्यटकां मदीं 56 रशियन आनी 13 युकेच्या पर्यटकांचो आस्पाव आसा. ऑक्टोबरांत 67 आनी डिसेंबर म्हयन्यांत सगळ्यांत चड पर्यटकांक बुडटाना वाटायले.
दर्यादेगेर मजतीची गरज आशिल्ल्या भुरग्यांचो आनी तरणाट्यांचो आंकडो खूब वाडलो. बेपत्ता जाल्ल्या व्यक्तींच्या घडणुकेंत 97 नेण्टीं भुरगीं गर्देंत आपल्या कुटुंबांतल्यान पयस जाल्ल्याची नोंद जाली. लायफगार्डानी 110 लोकांक पयली मजत दिली, तातूंत कंवची लागून जाल्ली जखम, रस्ताद सुण्यांनी चाबप आनी हेर घडणुकांचो आस्पाव आसा. 2025 वर्सा सुण्यांच्या चाबण्याच्या 12 दुयेंतींचेर उपचार जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
