भांगरभूंय | प्रतिनिधी
नवी दिल्ली, खबरां संस्था ः 2024 वर्सा हवामानांतल्या बदलाक लागून संवसारभर गिमाच्या दिसांचो आंकडो 41 दिसांनी वाडलो. हे संबंदी एक नवो संशोधन अहवाल उजवाडाक आयला. वर्ल्ड वेदर ॲट्रिब्युशनचे प्रमुख डॉ. फ्रेडरिक ओटो हांणी सांगलें, 2024 वर्स हें आतां मेरेनचे सगळ्यांत उश्ण वर्स आशिल्लें.
उश्णताय आनी ताचे कडेन संबंदीत आशिल्ल्या दुयेंसांक लागून संवसारभर लाखांनी लोक स्थलांतरीत जाल्यात. तशेंच हवामानांतल्या बदलाक लागून हुंवार, वादळ आनी दुकळ हाका लागूनय लोकांक जायते त्रास जाले अशें तांणी सांगलें.
जो मेरेन संवसार जीवाश्म इंधन जळयत रावतलो तो मेरेन हवामानांतल्या बदलांची समस्या वाडत वतली अशें ओटो हांणी सांगलें. दर वर्सा तापमान 2 अंश सेल्सियस वाड जायत रावल्यार 2040 मेरेन परिस्थिती गंभीर जावंक शकता अशेंय संशोधनांत म्हणलां.
संशोधन अहवालांतले कांय म्हत्वाचे मुद्दे…
० 29 सैमीक आपत्तींतल्या 26 संकश्टांचो हवामान बदला कडेन संबंद आशिल्लो.
० कांय सुवातींनी देडशे वा ताचे परस चड दीस हवामान उश्ण उरलें.
० हवामानांतल्या बदलाक लागून जावपी लुकसाण जावचें न्हय हे खातीर बेगीन पावलां उबारपाची गरज आसा.
० संवसारभर ही उश्णताय ल्हार सुमार 13 म्हयने तिगून उरली.
संयुक्त राश्ट्रांच्या पर्यावरण कार्यावळीन शिटकावणी दिल्या की जर कसलीच पावलां उबारलीं नात जाल्यार हवामानांतल्या बदलाक लागून जावपी घडणूकांनी आनीक वाड जावंक शकता. कारण अंदूं जीवाश्म इंधन जळपाक लागून फाटल्या वर्सा परस चड कार्बन डाय-ऑक्सायड वातावरणांत सोडला जाका लागून चड लोकांक मरण आयलां. तशेंच धर्तरीय खूब तापल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
