भांगरभूंय | प्रतिनिधी
परराष्ट्र वेव्हार राज्यमंत्री कीर्तिवर्धन सिंह हांणी लोकसभेंत दिली म्हायती.
नवी दिल्ली, खबरां संस्था ः पोरूं 2,06,378 भारतीयांनी आपलें नागरीकत्व सोडून हेर देशांचें नागरीकत्व घेतलें. नागरीकत्व सोडपाची कारणां वैयक्तीक आसात. ही म्हायती लोकसभेंत परराश्ट्र राज्यमंत्री कीर्ति वर्धन सिंह हांणी दिली.
सरकारान फाटल्या 5 वर्सांचोय डेटा सादर केलो. ह्या आंकडेवारी प्रमाण, 2024 वर्सा भारतीय नागरीकत्व सोडपी लोकांचो आंकडो 2020 वर्सा परस सुमार अडेज पटींनी चड आसा.
काँग्रेसीचे खासदार केसी वेणुगोपाल हांणी विचारिल्ल्या प्रस्नाक जाप दितना मंत्री कीर्ती हांणी फाटल्या पांच वर्सांचो आंकडो दिलो. सरकाराच्या म्हणण्या प्रमाण 2020 वर्सा 85,256, 2021 वर्सा 1,63,370, 2022 वर्सा 2,25,620 आनी 2023 वर्सा 2,16,219 लोकांनी भारतीय नागरीकत्व सोडलें. हाचे आदीं हो आंकडो 2011 वर्सा 1,22,819, 2012 वर्सा 1,20,923, 2013 वर्सा 1,31,405 आनी 2014 वर्सा 1,29,328 आशिल्लो.
आंकडो वाडटा
2020 वर्सा सावन नागरीकत्व सोडप्यांचो आंकडो स्थिरपणान वाडत आसा. राज्यसभेंत सादर केल्ल्या आंकडेवारी प्रमाण, 2023 वर्साच्या तुळेंत 2024 वर्सा आंकडो मात्सो उणो. तेच बरोबर फाटल्या तीन वर्सांत हो आंकडो दोन लाखां वयर उरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
