भांगरभूंय | प्रतिनिधी
भारतीय अंतरिक्ष संशोधन संघटना (ISRO) आपल्या पयल्या मनीस अंतरिक्ष- उड्डाण ‘गगनयान’ ह्या मिशन खाला ह्या वर्साच्या निमाणे मेरेन दोन सुरवातीचें मिशन धाडटली. हांतूंत एक मिशन पुरायपणान मनीसबळ नाशिल्लें जाल्यार दुसऱ्या मिशनांत ‘व्योममित्र’ नांवाची बायल रोबोट धाडटले.
ह्या सुरवातीच्या मिशनाचो हेत म्हळ्यार गगनयान रॉकेट आपल्या मार्गांतल्यान सुरक्षीतपणान परत येवपाची खात्री करप. हाचे उपरांत फुडल्या वर्सा भारतीय अंतरिक्षयात्री अंतरिक्षांत वतले. केंद्रीय मंत्री जितेंद्र सिंह हांणी ही म्हायती दिली. तांणी सांगलें, राकेश शर्मा हो भारतीय हाचे पयलीं अंतरिक्षांत गेल्लो, पूण तें मिशन सोव्हिएत रशियाचें आशिल्लें, जाल्यार गगनयान मिशन भारतीय आसतलें आनी ते तयार करपीय भारतीय आसतले.
स्वातंत्र्याच्या 75व्या वर्सा गगनयान कार्यावळी खाला यान धाडपाची कल्पना आशिल्ली, पूण कोविड काळांत खूब गजाली चुकल्यो, अशें तांणी सांगलें. जायत्यो कार्यावळी 2- 3 वर्सां फाटीं गेल्यो. रशियेंत आमच्या अंतरिक्षयात्रींचें प्रशिक्षण सुरु आशिल्लें ते मदीं थांबोवचें पडलें. कोविड उणो जाले उपरांत तांकां प्रशिक्षण पुराय करपाक परतून रशियेंत धाडले. मिशन आदित्य एल 1 बेगीनूच अंतरिक्षांत धाडटले, अशें तांणी सांगलें.
गगनयान मिशन हें आत्मनिर्भर भारताची सगळ्यांत बरी देख थारतली, अशें सिंह हांणी सांगलें. भारतीय अंतरिक्ष प्रवासाच्या इतिहासांतलो हो एक मार्गदर्शक मैलांफातर थारतलो. सुर्याचो अभ्यास करपाच्या आदित्य एल 1 ह्या मिशनाची तयारी नेटान चालू आसा. अंतरिक्षांत भारताचो प्रवास उसरां सुरू जाला.
अंतरिक्षांत फुडें वचपाची आमी कल्पना केली तेन्ना अमेरिका आनी तेन्नाचो सोव्हिएत युनियन चंद्राचेर एक मनीस देंवोवपाच्या तयारीत आशिल्लें. तीन- चार वर्सां आदीं प्रधानमंत्री नरेंद्र मोदी हांणी पोरणी पद्दत सोडून अंतरिक्ष क्षेत्र खाजगी भौशीक भागीदारी खातीर उक्तें करपाचें थारायलें आनी ताचो सामको बरो परिणाम जाला, अशें सिंह हांणी सांगलें. मोदी हांच्या काळांत आमच्या देशाचें संशोधन अमेरिका आनी रशियेच्या पांवड्यार पावलां, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
