2023 चो वर्ड ऑफ द इयर- ‘रिज’

भांगरभूंय | प्रतिनिधी

लंडन, खबरां संस्था ः 2023 वर्सा खातीर ‘रिज’ हें उतर वर्ड ऑफ द इयर म्हणून वेंचून काडलां. ऑक्सफर्ड कोशांतय ताचो आस्पाव जाला. वर्ड ऑफ द इयरच्या वळेरेंत रिज – सिच्युएशनशिप, स्विफ्टी, प्रॉम्प्ट, सीड फ्लॅग, डी- इंफ्लुएंसिंग, हीट डोम आनी पॅरासोशियल अश्या 8 उतरांचो आस्पाव केला.
न्यूयॉर्क टायम्साच्या एका अहवाला प्रमाण, 2200 कोटी उतरांचो विश्लेशण करून ह्या आठ उतरांची निवड केल्या. हे शब्द 2023 वर्सा जाल्ले समाजीक बदल आनी प्रवृत्ती दाखयतात. 2022 वर्सा ऑक्सफर्डान गॉबलिन मोडाक वर्ड ऑफ द इयर म्हणून वेंचून काडिल्लो.
हॉलीवूडचो अभिनेतो टॉम हॉलंड हाणें एका मुलाखतींत रिज हो शब्द वापरिल्लो. तेन्ना सावन हो शब्द व्हायरल जालो. रिज म्हळ्यार रोमँटिक अपील. रिज हो शब्द मनशाची शैली, मोहकताय आनी आकर्शण हांचें वर्णन करपा खातीर वापरतात.

वेंचून काडिल्ल्या हेर उतरांचो अर्थ…..

सिच्युएशनशिप (Situationship) : अनौपचारीक मोगाच्या संबंदांचें वर्णन करपाखातीर ही संज्ञा तयार केल्ली. म्हळ्यार जोडीदारां मदीं संबंद आसा पूण ह्या संबंदाक अधिकृत नांव दिवंक ना.

बीज फ्लॅग (Beige Flag) : हो शब्द कंटाळो दिवपी व्यक्तीमत्व दाखयता. म्हळ्यार ज्या मनशांकडेन उलोवपाक वा इश्टागत करपाक आवडना.

डी-इंफ्लुएंसिंग (De- influencing) : हाचो अर्थ सोशल मिडियाचो वापर करून लोकांक एक खाशेलें उत्पादन घेवचें न्हय वा तें उणें वापरचें अशें सांगप.

स्विफ्टी (Swiftie) : हो शब्द पॉप गायिका टेलर स्विफ्ट हिची लोकप्रियता सांगपाखातीर वापरतात.

हीट डोम (heat dome) : उश्ण हवेक सापडपी उच्च दाब हवामान पध्दतीचो उल्लेख करता.

पॅरासोशल (Parasocial) : एका सेलिब्रिटी कडेन फॅन्सांक जें एके वटेनचें आकर्शण दिसता ताका पॅरासोशल अशें म्हण्टात.

प्रॉम्प्ट (Prompt) : कृत्रिम बुध्दीमत्तेच्या कार्यावळीक वा अल्गोरिदमाक दिल्ली सुचोवणी.

अशे तरेन हो शब्दकोश दर वर्सा अपडेट करतात. 1984 वर्सा ह्या शब्दकोशाची इलेक्ट्रॉनीक आवृत्ती विचारांत घेतली. हे खातीर 120 जाणांनी कोशांतल्यान उतरां टायप केलीं. 50 प्रूफ रीडर नेमले. शब्दकोशाची ऑनलायन आवृत्ती 2000 वर्सा सावन सक्रीय आसा. ऑक्सफर्ड शब्दकोशाचे सद्या २० खंड आसात. तातूंत ६ कोटी परस चड उतरां आसात.