भांगरभूंय | प्रतिनिधी
भांगरभूंय । प्रतिनिधी
पणजीः 2023 वर्स सोंपून आयच्यान नवें वर्स 2024 सुरू जाता. वर्सावळी प्रमाण ह्या वर्साय खूबश्यो राजकी घडामोडी घडल्यो. खवदळ घालपी राजकी घडणुको मात घडल्यो नात. 19 नोव्हेंबराक निलेश काब्राल हांणी मंत्रीपदाचो राजिनामो दिलो आनी त्याच दिसा सांजे आलेक्स सिक्वेरा हांचो मंत्रीमंडळांत आस्पाव जालो. पोरूंची ही सगळ्यांत व्हड अशी राजकी घडणूक म्हणल्यार अतिताय जावची ना.
2022 त विधानसभा वेंचणूक जावन परतून डॉ. प्रमोद सावंत हांच्या फुडारपणाखाला भाजप सरकार सत्तेर आयलें. उपरांत 6 म्हयन्यांनी काँग्रेसीच्या 8 आमदारांनी वेगळो गट करून भाजपांत प्रवेश केलो. काँग्रेस आमदारांच्या भाजप प्रवेशाक सप्टेंबरांत वर्स जालें. काँग्रेस आमदारांच्या भाजप प्रवेशा उपरांत वर्सभर मंत्रीमंडळ बदलाची चर्चा सुरू आसली. दिगंबर कामत आनी आलेक्स सिक्वेरा ह्या दोगांचो मंत्रीमंडळात आस्पाव जावन दोगा मंत्र्यांक काडटले, अशी चर्चा आशिल्ली. निलेश काब्राल, गोविंद गावडे, नीळकंठ हळर्णकार हांच्या नांवांची चर्चा आशिल्ली. अदीं मदीं चर्चेक नेट येतालो आनी मुख्यमंत्र्यांच्या स्पश्टीकरणा उपरांत चर्चा बंद जाताली. दिगंबर कामत, मायकल लोबो, आलेक्स सिक्वेरा हांचे सयत भाजपांत प्रवेश केल्ले आमदार तशेंच प्रदेश अध्यक्ष सदानंद शेट तानावडे हे आमकां खबर ना, अशें पत्रकारांक सांगताले.
नोव्हेंबरच्या मध्याक भौशीक बांदकाम खात्याचे नोकर भरतीच्या गैरवेव्हाराची चर्चा सुरू जाली. एका मंत्र्याक काडून आलेक्स सिक्वेरा हांचो मंत्रीमंडळांत आस्पाव जातलो, हें 17 नोव्हेंबराक स्पश्ट जालें. उपरांत दोन दिसांनी 19 नोव्हेंबराक सकाळीं निलेश काब्राल हांणी मंत्रीपदाचो राजिनामो दिलो आनी सांजे आलेक्स सिक्वेरा हांचो मंत्री म्हूण सोपूतविधी जालो. विधानसभा वेंचणुके उपरांत डॉ. प्रमोद सावंत हांचें सरकार सत्तेर आयले उपरांत मंत्रीमंडळांत जाल्लो हो पयलो बदल आसा. हो बदल 19 नोव्हेंबर 2023 ह्या दिसा जालो.
लुईझिनान तृणमुला खासदारकी सोडली
11 एप्रील 2023 ह्या दिसा लुईझिन फालेरो हांणी राज्यसभा खासदारकीचो राजिनामो दिलो. तृणमुल काँग्रेस पक्षाकूय तांणी सोडचीट दिली. विधानसभा वेंचणुके पयलीं आमदारकी तशेंच काँग्रेस पक्षाक सोडचीट दिवन तांणी तृणमुल काँग्रेसींत प्रवेश केल्लो.
सदानंद शेट तानावडे राज्यसभा खासदार
राज्यसभेचे एकसुरे सुवाते खातीर गोंयांत 24 जुलय 2023 ह्या दिसा मतदान जालें. प्रदेश भाजप अध्यक्ष सदानंद शेट तानावडे हांची राज्यसभेचेर बिनविरोध निवड जाली. विनय तेंडुलकार हांचो कार्यकाळ सोंपले उपरांत गोंयचे सुवाते खातीर वेंचणूक जाली.
माणिकराव ठाकरे काँग्रेसीचे प्रभारी
माणिकम टागोर हांकां प्रभारी पदाचे जापसालदारींतल्यान मुक्त करून काँग्रेस श्रेष्ठींनी माणिकराव ठाकरे हांची गोंय राज्याचे प्रभारी म्हूण नेमणूक केली. 23 डिसेंबर 2023 ह्या दिसा माणिकराव ठाकरे हांची प्रभारी पदाचेर नेमणूक जाली. त्याच दिसा आदले प्रदेश काँग्रेस अध्यक्ष गिरीश चोडणकार हांची त्रिपुरा, सिक्किम, मणिपूर आनी नागालँण्ड राज्यांच्या प्रभारी पदाचेर नेमणूक जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
