भांगरभूंय | प्रतिनिधी
केंद्रीय भलायकी राज्यमंत्र्यांची लोकसभेंत म्हायती
भांगरभूंय । प्रतिनिधी
पणजीः 2022त गोंयांतल्या 458 बाळकांक न्युमोनियाची लागण जाल्ली. तातूंतल्या 17 भुरग्यांक न्युमोनियाक लागून जीव वगडावचो पडलो. तातूंत एक वर्सां पिरायेच्या 9 आनी एक ते पांच वर्सां पिरायेच्या 8 भुरग्यांचो आस्पाव आशिल्लो, अशी म्हायती केंद्रीय भलायकी राज्यमंत्री भारती पवार हांणी लोकसभेंतल्या लेखी प्रस्नाक दिल्ले लेकी जापेंत दिल्या.
देशभरा सयत गोंयांतूय पोरूं न्युमोनियाच्या दुयेंतींचें प्रमाण गतीन वाडिल्लें. गोंयांतल्या 458 बाळकांक न्युमोनियाची लागण जाल्ली. तातूंतल्या एका वर्साच्या 9 भुरग्यांक आनी एक ते पांच वर्सा पिरायेच्या 8 अश्या वट्ट 17 बाळकांत मरण आयिल्लें, अशें मंत्री पवार हांणी जापेंत म्हणलां.
न्युमोनिया म्हणल्यार फुफ्फुरांत विशाऩू, बॅक्टेरिया वा चित्याक लागून जाल्लो संसर्ग. न्युमोनिया हें श्वसनमार्गाचें दुयेंस. ल्हान बाळका पासून जाण्ट्यां मेरेन कोणाकूय हें दुयेंस जावपाक शकता.
संवसारीक भलायकी संघटणेचे म्हायती प्रमाण 2019त संवसारभरांत पांच वर्सां पिराये सकयल्या सुमार 7.40 लाख भुरग्यांक न्युमोनियाक लागून मरण आयिल्लें. कोरोना म्हामारीच्या काळांत गोंया सयत लाखांनी लोकांक ‘कोरोना- न्युमोनिया’चो त्रास जाल्लो. ताका लागून खूबश्या दुयेंतींनी जीव वगडायिल्लो. पांच वर्सां पिरायेसकयलीं बाळकां तशेंच जाण्ट्यां मनशांची रोगप्रतिकारक शक्त उणी आशिल्ल्यान तांकां न्युमोनियाची लागण जाली जाल्यार मरण येवपाचो धोको चड आसता, अशें वैजकी तज्ञांनी आदांच स्पश्ट केलां.
चीनांतले स्थिती उपरांत राज्य भलायकी खातेंय अलर्ट
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
