भांगरभूंय | प्रतिनिधी
पडीक जमनी कडेन आडनदर
संवसारीक पांवड्याचेर यत्न जाले तरी 2021 त संवसारांतली 9.8% लोकसंख्या कुपोशित आनी अन्न असुरक्षे कडेन झगडटाली. म्हणल्यार सुमार 82.8 कोटी लोकांक फावो तितलें अन्न मेळूंक ना. दुसरे वटेन संवसारीक पांवड्यार दरवर्सा सरासरी 3.6 लाख हेक्टरा परस चड शेतकी जमीन पडीक आसा. हे जमनीचेर लागवड करूं येताली. पडीक जमनीक लागून मातयेचो दर्जो उणो जायत आसा.
आंकड्यांचें विश्लेशण केल्यार, संवसारीक पांवड्यार वट्ट 10.1 कोटी हेक्टर शेतकी जमीन अशीच सोडून दिल्या अशें दिसून आयलें. जी आकारान 1992 वर्साच्या वट्ट शेतकी जमनीच्या सुमार 7 टक्क्यांइतली आसा. सिंगापूरच्या नॅशनल युनिव्हर्सिटीच्या सहकार्यान केल्ल्या जागतीक अभ्यासाचो अहवाल ‘नेचर कम्युनिकेशन्स’ ह्या नेमाळ्यांत उजवाडाक आयला. ह्या अहवाला प्रमाण आशियांत सगळ्यांत चड शेतकी जमीन वापरूंक नाशिल्ली. ही सुमार 3.3 कोटी हेक्टर जमीन आसा. ही वट्ट पडिक जमनीच्या एक तृतीयांश आसा. हाचे उपरांत युरोपांत 2.2 कोटी हेक्टर, आफ्रिकेंतली 1.9 कोटी हेक्टर शेतकी जमीन वापरा विणें पडून आसा. 2020 वर्साच्या एका अहवाला प्रमाण संवसारभर 8 कोटी हेक्टरां परस चड शेतकी जमीन पडीक आशिल्ली. म्हणल्यार तेन्ना सावन वापरूंक नाशिल्ले जमनींत 25% वाड जाल्या.
75% परस चड जमीन पडीक, पूण लागवड करूं येता
संवसारभर सुमार 8.3 कोटी हेक्टर पडीक जमीन रान जमनी खातीर वापरूं येता अशेंय ह्या संशोधनांतल्यान दिसून आयलां. हे जमनीचेर झाडां लायल्यार आनी रान तयार जाल्यार वर्साक सुमार 106.6 कोटी टन कार्बन डाय-ऑक्सायड शोशून घेवंक मेळटलो. हें जपानाच्या वर्सुकी वट्ट उत्सर्जना इतलें आसतलें. अशे तरेन हवामान बदल आनी संवसारीक उश्णताय आडावपाचे नदरेनय ताचो फायदो जातलो.
संवसारांतल्या अन्न उणावाची गरज भागोवपा खातीर शेतकी क्षेत्र वाडोवपाची गरज आसा. ते खातीर फुडल्या तीन दशकांत शेतकी जमीन सुमार 22.6 कोटी हेक्टरा मेरेन वाडोवची पडटली.
60% जमनीचो वापर, 48 कोटींक अन्न मेळूंक शकता
ह्या पडीक जमनीचो 6.1 कोटी हेक्टर म्हळ्यार सुमार 60% जमनीचें परतून शेतवडींत रुपांतर करूं येता अशें ह्या अभ्यासांतल्यान स्पश्ट जालां. नव्या लागवडींतल्यान वर्साक आनीक 363 पेटा- कॅलरी धान्य पुरवण करूं येता. जी दर वर्सा सुमार 48 कोटी लोकांक पोसवण दिवंक शकता. संशोधनाच्या मतान हे जमनींतली फकत 11% जमीन आसा, जी फकत शेता खातीर उपेग करपाक मेळटा. 33% जमीन आसा, जी फकत रान वाठारांक योग्य आसा. 7% जमीन आसा, जिचो कसलोच फायदो ना.
रशियेंत सगळ्यांत चड पडीक जमीन
12.4 दशलक्ष हेक्टर रेंवट जमनी सयत रशिया पयल्या क्रमांकाचेर आसा. चीनांत 87 लाख हेक्टर, ब्राझीलांत 84 लाख हेक्टर जमनींत आतां लागवड करपाक मेळना. मातयेचो पोत (दर्जो) उणो जावप, समाजीक बदल, आपत्ती, संघर्श अशीं कारणां ताका जापसालदार आसात, अशें शास्त्रज्ञ सांगतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
