भांगरभूंय | प्रतिनिधी
-दक्षीण गोंय जिल्होधिकाऱ्या कडल्यान परिक्षे विशीं नोटीस जारी
मडगांवः नोकरभरती खातीर 2019 त जायरात प्रसिद्ध केल्ली. उमेदवारां कडल्यान अर्ज घेतले उपरांत कांय कारणाक लागून आडखळिल्ली ‘क’ वर्गांतली नोकर भरती खातीर आतां 4 वर्सांनी प्रक्रिया सुरू करून परिक्षा घेतले. दक्षीण गोंय जिल्होधिकाऱ्यां कडल्यान जाहीर नोटीस काडून हे विशीं म्हायती दिल्या.
सरकारी नोकरेच्या सोदांत आशिल्ल्यांक चार वर्सांच्या कळावा उपरांत परतून प्रक्रिया सुरू जाल्ल्यान थाकाय मेळ्ळ्या. दक्षीण गोंय जिल्होधिकारी कार्यालयान ‘क’ वर्गांतली वट्ट 147 रित्या पदां खातीर भरती सुरू केल्ल्यान अखेर अर्ज केल्ल्यांक नोकरी मेळपाची आस्त निर्माण जाल्या.
फेब्रुवारी 2019 त सुरू जाल्ले हे भरती मोहिमेन सुरवातीक 24,668 उमदेवारां कडल्यान अर्ज आयिल्ले. मात हे नोकर भरतीक जायत्यो आडखळी आयल्यो. आनी प्रकिया लांबणेर पडली. हाचे पयलीं विधानसभा अविधेशनांतूय मंत्र्यां कडल्यान ही नोकर भरती सुरू जातली, अशें आस्वासन दिल्लें.
दक्षीण गोंयचे जिल्होधिकारी ए. अश्वीन चंद्रू हांणी आतां नोकर भरती परिक्षे विशीं जाहीर सुचोवणी जारी केल्या. जांणी गट ‘क’ पदां खातीर अर्ज केल्ल्या पात्र उमेदवारांक परिक्षे विशीं निर्देश दिल्यात. ह्या पदांत कनिश्ठ लघुलेखक (ज्यु, स्टेनोग्राफर), तलाठी, कनिश्ठ लिपीक आनी भोव कार्यकारी कर्मचारी (मल्टीटास्कींग स्टाफ) हे सारक्या पदांचो आस्पाव आसा. एम्पॉयमेंट एक्स्चेंज आनी सैनीक कल्याण विभागान वेगवेगळ्या श्रेणींत शिफारस केल्या. नोटिशी प्रमाण, उमेदवारां खातीर कुशळटाय चांचण्यो 29 सप्टेंबराच्यान सुरू जातल्यो. ते उपरांत प्राथमीक परिक्षेंतल्या कामगिरीच्या आधाराचेर पात्र थारिल्ल्या खातीर लेखी परिक्षा जातली. 147 रित्या पदां खातीर व्हड संख्येन अर्ज सादर केल्ल्यान, भरती मोहिमेंत सुरवातीक मोट्या प्रमाणांत उमेदवारां कडल्यान अर्ज आयिल्ले. अर्जदारां मदीं कनिश्ठ लिपीक पदां खातीर इत्सूक पदवीधरांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
