भांगरभूंय | प्रतिनिधी
नवी दिल्ली, खबरां संस्था ः भारतांत वागा प्रमाण हतयांची गणना जाता. पूण हे खेपे गणनेची निमाणी आंकडेवारी मेळपाक कळाव जातलो. अंदूं वागांची गणना आनी आंकडेवारीकय कळाव जाल्लो. ताका लागून ही आंकडेवारी दोन टप्प्यांनी जाहीर जाली. वागां भशेन हतयांची शिकार, तस्करी जाता म्हणून ही गणना गरजेची आसा.
हतयांची गणना केन्ना जाता?
पांच वर्सांतल्यान एकदा हतयांची गणना करतात. ते मुखेलपणान हतयांची संख्या मेजपी राज्यांचेर आदारून आसता. हालींच्या वर्सांनी हतयांचें जल्म प्रमाण आनी संख्येचो अदमास करपा खातीर तंत्रांचोय उपेग केला. 2017 वर्सा निमाणे गणने प्रमाण भारतांत 29,964 हती आशिल्ले, जे संवसारीक आशिया हतयांच्या 60 टक्के हती आसात. सद्या देशांतल्या 14 राज्यांनी सुमार 31 रान वाठार हतयां खातीर राखून दवरल्यात. फाटल्या तीन वर्सांत दांडेली हती राखीव वाठाराक कर्नाटक राज्यांन अधिसूचित केलां, नागालँडांतलो सिंगफन एलिफंट रिझर्व्ह आनी छत्तीसगडांतलो लेमरू हती रिझर्व्ह हांचो नव्या रानांत आस्पाव आसा.
खंयच्या राज्यांत हती चड?
कर्नाटक राज्यांत सगळ्यांत चड हती आसात. संवसारांतल्या वट्ट हतयांतले 60 टक्क्यां परस चड रानटी आशियाई हती भारतांत आसात. 2017 वर्सा केल्ले जनगणने प्रमाण, भारतांत एक लाख धा हजार चौखण किलोमीटर वाठारांत 29 हजार 964 हती रावतात. ईशान्य वाठारांत 10 हजार 139 हती आसात. उदेंत- मध्य प्रदेशांत 3 हजार 128, वायव्य वाठारांत 2 हजार 85 आनी दक्षीण वाठारांत 11 हजार 960 हती आसात. कर्नाटक राज्यांत सगळ्यांत चड 6 हजार 49 हती आसात.
फाटल्या पांच वर्सांत कितले हती वगडायले?
फाटल्या पांच वर्सांत भारतांत 528 हतयांचो नाश जाला. हतयांच्या मरणाची आंकडेवारी पावसाळी अधिवेशनात जाहीर केल्ली. ताचे प्रमाण अवैध शिकार, विशबाधा, शॉक लागप आनी रेल्वे अपघात सयत अनैसर्गिक कारणांक लागून भारतांत फाटल्या पांच वर्सांत 528 हत्तयांचो नाश जाला. चडशा हत्तींक रेल्वे अपघातांत मरण आयला. ह्या काळांत भारतांत मनीस- हती संघर्शांत 2 हजार 853 मनशांक मरण आयलें. भारत सोडल्यार हेर देशांनी हतयांची शिकार आनी तांची रावपाची सुवात नश्ट जायत आशिल्ल्यान हतयांचो आंकडो खूब उणो जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
