भांगरभूंय | प्रतिनिधी
पणजीः हालींच लग्न जाल्ल्या २०० परस चड घरकान्नींनी गृह आदार येवजणे खातीर अर्ज केला. तांच्या अर्जांचे कागदपत्रांची प्रक्रीया चालू आशिल्ल्यान तांकां आजून मेरेन लाव येवप सुरू जावंक ना, अशी म्हायती बायल आनी भुरगीं कल्याण खात्यान दिल्या.
एकदां चली लग्न जाले उपरांत आपल्या लग्नाचो दाखलो तिका बायलां आनी भुरगीं कल्याण खात्यात गृह आदार येवजणे खातीर अर्ज करचो पडटा. हालींच एका वर्साच्या काळांत लग्न जाल्ले वट्ट २७६ बायलांचे २ जानेवारी २०२६ मेरेन गृह आदार येवजणे खातीर अर्ज दाखल जाल्यात.
हे सगळ्या अर्जांचेर प्रक्रीया चालू आसा. सगळ्यांत चड २०० अर्ज अपुरे आसात आनी अर्जदारान सगळे दोकुमेंत दिले उपरांत तांचे अर्जाक मान्यताय मेळटली.
जाल्यार ३७ अर्ज पात्रताय पडताळणी सर्वेक्षण आनी समिती निर्णयाक लागू प्रलंबीत आसात. हे अर्ज गृहीत धरप काय भायरावप हे विशींचो निर्णय घेवपा खातीर हे अर्ज गृह आदार समिती मुखार मांडटले.
मजगतीं १९ अर्ज हे गोवा इलेक्ट्रोनिक्स लिमिटेड कडेन (जीईएल) डिजीटायझेशन आनी पडटाळणी खातीर प्रलंबीत आसात. डिजीटायझेशन आनी पडटाळणी प्रक्रीये उपरांत अर्ज पात्र थारलो जाल्यार तो मान्य जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
