भांगरभूंय | प्रतिनिधी
सरकारान उपाय काडपाची लाबार्थ्यांची मागणी
भांगरभूंय । प्रतिनिधी
म्हापशें: गोंयांत 20 पॉयंट प्रोग्राम कार्यावळी खाला सुमार 5076 प्लॉट वितरीत केल्यात. ह्या प्लॉटांचेर फाटल्या 30- 38 वर्सां सावन घरां बांदल्यांत. तातूंतलीं 99 टक्के घरांचें विस्तारीकरण पक्क्या घरांनी जालां. सध्या अका घराचें न्यायलयांत आशिल्लें प्रकरण विरोधांत गेलें जाल्यार वयलीं सगळीं घरां संकश्टांत सांपडपाची शक्यताय आसा. सरकारन हीं घरां वाटोवपा खातीर वेळार योग्य उपाय काडपाची गरज आसा.
जमीन नाशिल्ल्यांक जमीन मेळोवन दिवप ह्या उद्देशान 1985- 86 त तेन्नाची प्रधानमंत्री इंदिरा गांधी हांणी इंदिरा आवास येवजण ही 20 पॉयंट प्रॉग्राम ही येवजण सुरू केल्ली. चड करून अनुसुचीत जाती आनी जमाती, ओबीसी तशेंच गरीब घटकाक रावचे खातीर घर मेळचें, हे खातीर ही येवजण चालीक लायिल्ली. येवजणे खाला सरकारा कडल्यान गरजेवंत लाबार्थ्यांक 100 चौखण मिटराचो प्लॉट दिला. हे जमनीची मालकी सनद जिल्होधिकाऱ्या वतीन संबंदितांक वितरीत केल्ली.
हे जमनीर घराचें बांदकाम करतना कच्चें बांदकाम आसचें, अशी अट घातिल्ली. कालांतरान लाबार्थी कुटुंबाचो विस्तार जाले उपरांत ह्या लोकांनी पल्या घराचेर एक माळो, दोन माळे काडून तेवूय पक्क्या बांदकामांत रुपांतर केलें. हे करतना त्या लोकांनी कायदेशीर मंजुरी घेवंक ना. पंचायत आनी पालिकांच्या लोकप्रतिनिधींच्या बऱ्यापणान हीं बांदकामां जालीं.
हालींच सुकूर पर्वरीच्या एका 20 पॉयंट प्रॉग्रामाच्या घराचेर पंचायतीन अतिक्रमण विरोधी कारवाय केल्ली. हे कारवायेक संबंदितांनी न्यायालयांत आव्हान दिल्ल्यान हें प्रकरण सध्या न्यायालयांत पावलां.
बदलपी जिवनशैलीक धरून लोकांनी आपले सोयी प्रमाण घराचो विस्तार केला. पूम न्यायालयान वयले याचिके प्रमाण याचिकादारा आड निकाल दिलो जाल्यार हे येवजणेंतलीं सगळींच म्हणल्यार वट्ट 5076 घरांक तो निवाडो लागू जातलो. तशें जालें जाल्यार लोकांचेर व्हड संकश्ट येतलें. हे येवजणे खातीर गोंयांतले मामलेदार- उपडजिल्होधिकारी कार्यालयांत अजून सुमार देड हजार अर्ज प्रलंबीत आसात. तशेंच हे येवजणे खातीर आरक्षीत केल्ल्या 17 ल्पॉटांचेर अतिक्रमण केलां. सरकारान सध्या हे येवजणेचें नांव बदलून प्रधानमंत्री आवास येवजण, अशें केलां.
अतिरिक्त बांदकाम कायदेशीर करचें: दीपेश नायक
सध्या बदलत्या काळा प्रमाण रस्ते, पूल हे सारक्या मुळाव्या साधन सुविधांचो विस्तार जाला. अश्या वेळार 30- 40 वर्सां आदीं प्लॉट मेळिल्ल्या 20 प्रॉग्राम लाबार्थी गरीब कुटुंबांतले लेगीत वांगडी वाडल्यात. ते प्रमाण तांणी घराचो विस्तार केला. सरकारान घरांचें हें अतिरिक्त बांदकाम कायदेशीर करून मूळ भुंयपुतांक थाकाय दिवची, अशी मागणी कूळ मुंडकार संघटणेचे समन्वयक दीपेश नायक हांणी केल्या.
म्हाल आनी लाबार्थी
तिसवाडी- 327
बार्देस- 1179
दिवचल- 604
सत्तरी- 613
मुरगांव- 26
सांगें- 348
धारबांदोडें- 460
फोंडें- 527
साश्ट- 502
केपें- 318 काणकोण- 172
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
