भांगरभूंय | प्रतिनिधी
पोरणें इमारतींत सुरू जावन नवे इमारतींत सोंपतले
नवी दिल्ली : संसदेचें पावसाळी अधिवेशन 20 जुलया सावन सुरू जातलें आनी 11 ऑगस्ट मेरेन चालू आसतलें. संसदीय वेव्हार मंत्री प्रल्हाद जोशीन ट्विट करून ही म्हायती दिल्या.
पावसाच्या अधिवेशनांत विधीमंडळाच्या कार्यावळीचेर आनी हेर प्रस्नांचेर अर्थपूर्ण चर्चा करपाक सगळ्या पक्षांनी योगदान दिवचें अशी विनवणी केल्या. दुसऱ्या ट्विटांत तांणी सांगलां की, पावसाळी अधिवेशन 23 दीस चलतलें आनी 17 बसका जातल्यो. संसद सूत्रांनी आदीं सांगिल्लें, पोरणे इमारतींतल्यान कामाक सुरवात जावं येता आनी मागीर संसद नवे इमारतींत स्थलांतरीत जातली.
8 मे दिसा प्रधानमंत्री नरेंद्र मोदी हांणी नवे संसद इमारतीचें उक्तावण केलें.
ह्या वेळार पावसाळी सत्रांत ‘वादळ’ जावपाची शक्यताय आसा. कारण फुडल्या वर्सा जावपी लोकसभा वेंचणुकेचे फाटभुंयेर प्रधानमंत्री नरेंद्र मोदी हांच्या फुडारपणा खाला भाजपा आड विरोधी पक्ष एकठांय येवपाक लागल्यात. ते भायर प्रधानमंत्री मोदीन समान नागरी संहितेचो पुरस्कार केला आनी ह्या विशयाचेर मुखार पावलां उबारल्यांत, अशा वेळार संसद बसका जाता.
यूसीसी बिल सादर करूं येता
मोदी सरकार पावसाच्या अधिवेशनांत समान नागरी कायद्या विशीं विधेयक मांडूं येता. हालींच प्रधानमंत्री मोदीन यूसीसी संबंदी विधान केल्या उपरांत ताचे विशीं खबरो नेटान वाडला. 27 जून दिसा मोदीन भोपाळांत सांगिल्लें की दोन कायद्यांक लागून घर चलना, जाल्यार मागीर दोट्टी पद्दतीन देश कसो चलतलो?
काँग्रेसीनय तयारी सुरू केली
संसद अधिवेशनाच्या आदीं काँग्रेसीनय तयारी सुरू केल्या. यूसीसी विशीं प्रधानमंत्री मोदी हांणी दिल्ल्या निवेदना उपरांत काँग्रेसीन केंद्राचेर हल्लाबोल केला. अशे परिस्थितींत ह्या विशयाचेर ग्रँड ओल्ड पार्टीची भुमिका संसदेंत मांडूं येता. पावसाच्या अधिवेशना संबंदीं काँग्रेस संसदीय समितीची बसका शेनवारा (1 जुलय) सोनिया गांधी हांच्या अध्यक्षते खाला जाता. ही बसका 10 जनपथाचेर आपयल्या.
सरकाराक घेरपाचो हेतू
दिल्लींत ट्रान्स्फर पोस्टिंगच्या प्रकरणाचेर उपराज्यपालाक अधिकार दिवपी विधेयकाचेर मोदी सरकाराक विरोध जावं येता. दिल्लीचे मुख्यमंत्री अरविंद केजरीवाल देशभर भोंवून भाजपा आड पक्षांक मेळून ह्या प्रकरणांत तांचो तेंको घेता. केजरीवालान काँग्रेसीकय ह्या विधेयकाक विरोध करपाक सांगलां, पूण पक्षान अजून आपली भुमिका स्पश्ट करूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
