भांगरभूंय | प्रतिनिधी
नवी दिल्ली, खबरां संस्था ः केंद्र सरकारान टोल कर संबंदी म्हत्वाचो निर्णय घेतला. ह्या निर्णयाचो कोटी लोकांक फायदो जातलो. केंद्रीय रस्तो आनी येरादारी मंत्रालयान टोल कर संबंदी नवे नेम दारी केल्यात. ते प्रमाण 20 किमी मेरेन टोल रस्ते वापरपी गाडयाकारांक टोल भरचो पडचो ना. ते खातीर तांकां तांच्या गाडयेर ग्लोबल नेव्हिगेशन सॅटेलायट सिस्टीम (जीएनएसएस) जाय पडटली. हो नेम पुराय देशांत चालीक लायला. जीएनएसएस आशिल्ल्या गाडयाकारांक ही सुट मेळटली.
रस्तो येरादारी मंत्रालयान अधिसुचोवणी जारी केल्या. ते प्रमाण राज्य म्हामार्ग आनी राष्ट्रीय म्हामार्ग वापरपी खाजगी गाडयाकारांक टोलांतल्यान सुट दिल्या. महामार्गार 20 किमी मेरेन गाडी चलोवपी लोकांक ही सवलत मेळटली. पूण ते खातीर तांच्या गाडयेचेर जीएनएसएस आसपाक जाय. 20 किमी परस चड टोल रस्तो वापरपी लोकांक त्या अंतराचेर आदारून टोल शुल्क आकारतले.
जीएनएस सिस्टीम कितें?
ग्लोबल नेव्हिगेशन सॅटेलायट प्रणाली (GNSS) हें एक म्हत्वाचें तंत्रज्ञान. गूगल मॅप आनी हेर संचार प्रणाली सारकिल्या मोबायल नेव्हिगेशन ऍप्लिकेशनांत ताचो उपेग करतात. ह्या तंत्रगिन्यानाचो वापर देशांत टोल वसूल करपा खातीर सुरू आसा. केंद्र सरकाराच्या रस्तो आनी येरादारी मंत्रालयान कांय दिसां आदीं फास्टॅगा वांगडा ग्लोबल नेव्हिगेशन सॅटेलायट प्रणाली चालीक लायिल्ली.
मजगतीं, सद्या ही पद्दत पायलट प्रकल्प आसा. कर्नाटक आनी हरियाणांत ताची अंमलबजावणी जाल्या. हो पायलट प्रकल्प येसस्वी जाले उपरांत ही पद्दत पुराय देशांत चालीक लायतले. केंद्र सरकार आतां टोल वेवस्थेंतूय व्हड प्रमाणांत सुदारणा हाडटा. तुमी जितलें अंतर प्रवास करतलें, तितलोच आतां टोल आकारतले. देखून टोलांत पारदर्शकता आसतली. आनी टोल प्लाझांचेर लांब रांक आसची ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
