भांगरभूंय | प्रतिनिधी
भांगरभूंय । पत्रक
पणजीः कोंकणीचो आसपाव संविधानाचे आठवे परिशिश्टांत आसपाव केल्लो 20 ऑगस्ट हो दीस कोंकणी अकादेमी कोंकणी राष्ट्र मान्यताय दीस म्हणून मनयता. अंदूच्या 30 व्या राष्ट्र मान्यताय दिसा आयोजीत कार्यावळींत कोंकणी अकादेमीन प्रकाशीत केल्ल्या 6 पुस्तकांचें तशेंच अकादेमीच्या अनन्य हे साहित्य पत्रिकेच्या 16 व्या अंकाचें विमोचन करतले.
अकादेमी माध्यमीक विद्यालयां खातीर कोंकणी पुस्तकांचे संच भेटयतली. तेच वांगडा हे कार्यावळींत कोंकणी अकादेमीच्या वावुरपी मंडळाचे वांगडी आनी नामनेचे कवी .संजीव वेरेंकार हांका 2021 वर्साचो केंद्रीय साहित्य अकादेमीचो पुरस्कार फावो जाल्ले खातीर अकादेमीचे वतीन तांचो भोवमान करतले.
हे कार्यावळीक मुख्यमंत्री डॉ. प्रमोद सावंत हे मुखेल सोयरे म्हणून उपस्थीत रावतले जाल्यार ज्ञानपीठ पुरस्कारान भोवमानीत साहित्यीक दामोदर मावजो हे मानाचे सोयरे आसतले. कार्यावळ शेनवार 20 ऑगस्टाक सकाळी 10 वरांचेर पणजेच्या इन्स्टिट्यूट मिनेझिस ब्रागांझाच्या सभाघरांत जातली.
हे कार्यावळींत लोकार्पण जावपाची पुस्तकां फुडले भशेन आसात- कोंकणी शब्दसागर – खंड-3 (कोंकणी कोश – इ ते अः) संपादन- डॉ. अनंत राम भट, दो काश्मुर्र- मूळ पुर्तुगीज कादंबरीः जोंकी मारिया माशादु द आसिस, कोंकणी अणकारः नारायण भास्कर देसास, कोंकणी भाशेचें अध्यापन (दुसरी आवृत्ती) -प्रो. वसंत गोविंद लवंदे, लोकबिंब (दुसरी आवृत्ती) – डॉ. जयंती नायक, लोकउत्सव – डॉ. जयंती नायक, क्रिस्तांवांचो जागोर – मार्कोस गोन्साल्वीस, अनन्य- अंक 16 (जानेवारी ते जून 2022 संपादक- डॉ. जयंती नायक . ही कार्यावळ सगळ्यां खातीर उक्ती आसा अशें अकादेमीच्या सुत्रांनी जाहीर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
