भांगरभूंय | प्रतिनिधी
आरजेपॅपिलॉनाच्या संचालका सयत हेरां आड गुन्यांव
पणजी: गोंयच्या सुमार 160 गुंतवणुकदारांक चड कळंतराचें हांयस दाखोवन 2.37 कोटी रुपयांची तोपी घाल्ल्या प्रकरणांत अर्थीक गुन्यांव विभागान (ईओसी) आरजेपॅपिलॉन निधी लिमिटेड लि. कंपनीच्यो वेवस्थापकी संचालक वृषाली ताम्हाणे, संचालक पल्लवी रंगले, गौतम जाधव, मनिषा जोशी, रमेश जोशी, अनूप अधिकारी हांचे सयत 22 एजंटा आड गुन्यांव दाखल केला.
अर्थीक गुन्यांव विभागान (ईओसी) दिल्ले म्हायती प्रमाण ह्या प्रकरणांत राज्यांतल्या गुंतवणुकदारा वतीन पुलीस निरिक्षक रमेश शिरोडकार हांणी कागाळ दाखल केल्या. ते प्रमाण गोंयांत 1 एप्रील 2021 ते 30 ऑक्टोबर 2024 मजगतीं आरजेपॅपिलॉन निधी लिमिटेड लि. कंपनीन गोंयांत विवीध सुवातांनी फांटे उक्ते करून गोंयच्या गुंतवणुकदारांक चड कळंतराचें हांयस दाखयलें. ते प्रमाण दुबावीत वेवस्थापकी संचालक वृषाली ताम्हाणे, संचालक पल्लवी रंगले, गौतम जाधव हांणी गोंयांत एजंट नेमले.
तांचे वतीन कंपनीन म्हयन्याचो प्लॅन (एमपी), फिक्स डिपोझीट प्लॅन (एफडी) आनी हेर येवजणे खाला गुंतवणूक करपाक लायलें. हे येवजणे खाला 160 गुंतवणुकदारांनी सुमार 2 कोटी 37 लाख 96 हजार 622 रुपयांची गुंतवणूक केल्या.
मजगतीं, कंपनीन गोंयांतले सगले फांटे बंद करून पळ काडलो. ताका लागून आपली फटवणूक जाल्ल्याचें लक्षांत आयले उपरांत गुंतवणुकदारांनी फांट्यांत धांव घेतली. हाची दखल घेवन ईओसीचे पुलीस निरिक्षक राझाशद शेख हांणी आरजेपॅपिलॉन निधी लिमिटेड लि. कंपनीचे वेवस्थापकी संचालक वृषाली ताम्हाणे, संचालक पल्लवी रंगले, गौतम जाधव, मनीषा जोशी, रमेश जोशी, अनूप अधिकारी हांचे सयत 22 एजंटा आड भारतीय दंड संहितेच्या कलम 406,409, 420, आरडब्ल्यू 120 बी,3 आनी 5 गोंय गुंतवणुकदारांचें हितरक्षण कायदो आनी हेर कायद्या खाला गुन्यांव दाखल करून तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
