भांगरभूंय | प्रतिनिधी
सामान्य प्रशासन खातें : तीन वर्सां परस चड काळाचे रजेर गेल्याची म्हायती
भांगरभूंय । प्रतिनिधी
पणजीः तीन सरकारी खात्यांतल्या चार कर्मचाऱ्यांनी 2 वर्सां परस चड काळा खातीर रजा घेतल्या. तातूंतले दोग जाण पगारा विणें असादारण रजा घेवन फाटलीं तीन वर्सां जालीं नोकरी सोदपा खातीर विदेशांत गेल्यात. फक्त एकाच वर्सा खातीर सरकार भर पगारी रजा दिता, अशी म्हायती सामान्य प्रशासन खात्यान दिल्या.
विधानसभेच्या पटलार मडगांवचे आमदार दिगंबर कामत हांणी विचारिल्ल्या प्रस्नाक सामान्य प्रशासन मंत्री तशेंच मुख्यमंत्री डॉ. प्रमोद सावंत जाप दिताले. तांणी सांगलें, उद्देग खात्यांतलो एक, कायदो खात्यांतलो एक आनी भलायकी खात्याच्या दोन कर्मचाऱ्यांनी सामान्य प्रशासनाच्या खाला दोन वर्सां परस चड काळ रजा घेतल्या.
कायद्या खात्याची सहाय्यक कर्मचाऱ्यान आपले धुवेची कुयदाद घेवपा खातीर 13 जून 2020 ते 20 जून 2020 भरपगारी रजा घेतिल्ली. उपरांत 1 ऑक्टोबर 2020 ते 27 जानेवारी 2021 मेरेन मातृत्वाची रजा घेवन 28 जानेवारी 2021 ते 14 मार्च 2021 मेरेन भुरग्यांची कुयदाद घेवपा खातीर रजा घेतिल्ली. मागीर खाजगी कारण सांगून 15 मार्च 2021 ते 14 मार्च 2022 मेरेन असादारण पगारा विणें रजा घेवन हे रजे खातीर 15 मार्च 2022 ते 14 मार्च 2023 मेरेन मुजतवाड घेतली. उपरांत ती कर्मचारी 15 मार्च 2023 त परत कामार रूजू जाली.
भलायकी खात्याच्या दोन कर्मचाऱ्यांनी तीन वर्सां परस चड काळ रजा घेवन ते नोकरी सोदपा खातीर विदेशांत पावल्यात. तातूंतल्या एक कर्मचाऱ्याक 2026 मेरेन मुजतवाड मेळ्ळ्या. भलायकी खात्याच्या एक सहाय्यक कर्मचाऱ्यान पगारा विणें 1 फेब्रुवारी 2022 ते 31 जानेवारी 2024 मेरेन असादारण रजा घेतिल्ली. उपरांत 1 फेब्रुवारी 2024 ते 31 जानेवारी 2026 मेरेन ताका रजेंत मुजतवाड दिली. जाल्यार भलायकी खात्याचो दुसरो पालवी सहाय्यक कर्मचाऱ्यान 1 सप्टेंबर 2021 ते 31 ऑगस्ट 2023 मेरेन पगारा विणें असादारण रजा घेतिल्ली. उपरांत 1 सप्टेंबर 2024 ते 31 ऑगस्ट 2025 मेरेन ताका रजेंत मुजतवाड दिली.
हे दोनूय कर्मचारी तीन वर्सां परस चड काळ रजेर आसात आनी ते देशा भायर नोकरी सोदपाक गेल्यात. जे मेरेन ते रजेर आसात ते सरकारी कर्मचारी आसात आनी तांच्यो नोकऱ्यो वचूंक नात, पूण तांकां पगार ना. नोकरी मेळूंक ना जाल्यार ते कामार परत रूजू जातले आनी थंय तांकां नोकरी मेळ्ळी जाल्यार राजिनामो दितले. जर कर्मचारी पगारी रजा, प्रवासी रजा वा मातृत्वाची रजा घेता तांकां रजेच्या काळांत पुराय पगार मेळटा. जे कर्मचारी भुरग्यांची कुयदाद घेवपा खातीर रजा घेतात तांकां पयल्या 365 दिसां खातीर 100 टक्के पगार मेळटा, उपरांत उरिल्ल्या काळांत तांकां फक्त 80 टक्के पगार मेळटा. जाल्यार एका म्हयन्या वयर कर्मचारी रजेर आसा आनी ती कसलीय रजा आसूं ताका येरादारी भत्तो पगारा वांगडा मेळना. ज्या कर्मचाऱ्यांनी असादारण रजा घेतल्या तांकां रजेच्या काळांत पगार मेळना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
