भांगरभूंय | प्रतिनिधी
दूरसंचार मंत्रालयाचे सुरक्षा परिशदेंत म्हायती
भांगरभूंय । प्रतिनिधी
मडगांव : दूरसंचार मंत्रालयाच्या दूरसंचार विभागान फाटल्या 2 वर्सांत 4 कोटीं परस चड बनावट मोबायल कनेक्सन तोडल्यात आनी सुमार चोरयेक गेल्ले 6 लाख मोबायल फोन जप्त केल्यात. तातूंत सायबर क्रायमाचेर बोट दाखयतात, अशें संचालक प्रमोद सपकाळे हांणी सांगलें.
दूरसंचार मंत्रालयाच्या दूरसंचार विभागान द7ण गोंयांत वर्सुकी अस्तंत वाठार दूरसंचार सुरक्षा परिशदेचें आयोजन केल्लें. संबंदीत खात्यांतलो समन्वय घटमूट जातलो आनी दूरसंचार सुरक्षा आव्हानांक फुडो करपाच्या उपाय येवजण्यांचेर चर्चा जाली.
संचार साथी अॅप आनी नवे फ्रॉड रिस्क आयटेंडिफिकेशन सिस्टम सारकिल्लीं साधनां दुबावीत नंबर सोदपाक आनी बँकांक अर्थीक फटवणुके पसून आडावपाक मजत करपाक म्हत्वाची भुमिका करतात.
सचीव डॉ. निरज मित्तल हांणी व्हिडियो कॉन्फरन्सींग वरवीं मार्गदर्शन केलें. तांणी सांगलें, केंद्रीय दूरसंचार विभागान फटोवपी कारवायां खातीर वापरतात ते कोट्यांनी फोन कनेक्शन ब्लॉक केल्यात आनी संचार साथी सारक्या उपक्रमांच्या सुरवातीक लागून स्फूफ कॉल्स 97 टक्क्यांनी उणे करपाक येस आयलां. दूरसंचार विभागान एक डिजिटल इंटेलिजेन्स प्लॅटफॉर्म विकसीत केला, जो वित्तीय संस्थांक म्हायती एकठांय करपाक आनी वित्तीय मलार जावपी फटवणुके विशीं म्हायती दिवपाक मजत करता. ही म्हायती निर्माण करपाक आनी सायबर सुरक्षीत वातावरण सक्रियतरेन तयार करपाक मजत करता, अशें तांणी सांगलें.
दरेका मळार मुळाव्यो सुविधा दिवपाक दूरसंचाराची भुमिका गतीन वाडल्या. दूरसंचार वापरपी वाडल्यात, तशेंच अर्थीक मळा वयल्या दूरसंचार संसाधनांचो गैरवापर ते प्रमाणांत वाडला.
देशाची सायबर सुरक्षा सुदरावचे खातीर दूरसंचार विभागान खूबशीं पावलां उखल्ल्यांत. उच्च दर्जाची दूरसंचार उपकरणां सुनिश्चीत करपा खातीर दूरसंचार चांचणी प्रयोगशाळा लेगीत वाडयतात. आर्टिफिशियल इंटेलिजेन्साच्या (एआय) वापराक लागून 78 लाख फटकिरीं कनेक्शनां आनी 71 हजार पॉयंट्स ऑफ सेल डिस्केनेक्ट जाल्यात. विभाग क्षेत्रीय आनी अनुप्रयोग- विशिश्ट सुरक्षा सुदारवचे खातीर खाजगी संस्थांचो आदार घेतात.
दूरसंचार विभागान भागिदारांच्या आदारान अर्थीक फटवणूक जोखीम निर्देश सुरू केला, जो फटकिऱ्या वावरां खातीर वापरतात त्या मोबायल नंबराचो सोद घेवपाक खुबूच येसस्वी जाली. दूरसंचार विभाग केंद्रीकृत देखरेख प्रणाली लेगीत अपग्रेड करतले. इंटरनॅट देखरेख प्रणालीची तांक सुदारवपा खातीर काम करतात, अशेंय ह्या सत्रांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
